Atanukana mak tipatshimuna

Napaien Muanan, nitishinikatakaun, nishuaush nitatunnuepipuneshin. Ninipauti mak patetat itashipanat nitauassimat kie tauat nussimat. Apu tshissenitaman tanite nipa utshipan: Muanan. Nutaui mak nukumesh Atuaniss mukᵘ nitshissenimauat, nete takupanat Pakut-shipit kie Unaman-shipit, ekute uetuteht. Tanite ututetshe nana nimushum Jos Mullen, nasht apu tshissenimak, nete Tshishe-shatshit kie ma Mishta-minishtikut put. Akaneshau uesh na nimushum. Nutaui Shinipesht ishinikatakanipan. Ekᵘ nana nikaui, Manakanet ekuanitshiushkueu nana uin. Nete Manitu-nipit nitinniuti, apu nashkuat katakᵘ anite Ekuanitshit. Peikunnueshipanat ashu peikᵘ nishteshat kie nishimat.

Nanitam nititatan nutshimit, patush katshi nipauian ekue pessish ute Ekuanitshit taian. Nutaui mak nimushum Mishtikushish kie ne nimushum Tamienish. Ninataunan : amishkua, atikuat. Piakuaiki nipissa, ekue nashipeiat. Nitepauananat nimushuminan Nuna mak Shushep. Nimanukashunan anite ekue mitshishunanut : atikuiash, pashteuiash, mupimenanu ashit. Ekue nashipeiat.

Mishta-atussenannikupan nanitam, mishta-atussepan auen. Ekᵘ anutshish nin, shash tshekat nishuasht-tatupipuna apu tshekuan tshi tutaman, mukᵘ nitapin, mukᵘ nimitshishun mukᵘ tshiam. Ueshkat nete nutshimit etaian, apu ut ishinakuak, nimishta-papamuteti, mishta-katakᵘ nitituteti. Mishta-kashtshi-tipishkapan tshaueiani. Mauat ma auen nita nika ut matenimau tshetshi nutshikut. Peikuau anite nitamishetshipan tanite mishta-kashti-tipishkau, tshissekau anite etuteiat. Nishtesh Mishen an nuitsheuau. Nitshiuenan an. Nasht pessish apu nukuak.

Apu nita pimuteian tshetshi ituteian nete Tshishe-shatshit, muk^u mishta-pessish anite nut tshiuen. Takuanipan anite utatauitshuap Mishta-Napeu, ekute natakanipan mitshim, ekute uet tshiueian. Kassinu neni etamuti pakatan-meshkanaua ute pessish Ekuanitshit kassinu neni nimitimeshken.

Nete nutshimit nut tshishkutamakauitan, anitshenat kanataushiht mak kanapua nimushum Mishtikushish, ekute tshessinuapiat. Tshitutakanipanat napessat kueshpinanuti. Mishta-mishapan atushkan ueshkat eshkᵘ eka kueshpinanuti, tshe tutakaniti mitshet tshekuana: ashamat, utapanashkᵘ mak makanipakan...  Katshi nipauian iu, peikuau anite nushikushin netauian, tshekat nitshipatashkushin mishtikᵘ tanite mishta-kashti-tipishkau anite etuteian, tshaueian, iu. Ushkat atikua nepat e peikussit, peikunnuepipuneshikupan ashu neu kie ma ashu patetat.

Apu nita auen matenimak nutshimit Eukuan mukᵘ tshiam nipetuati tiepuashit auen, nimushum Mishtikushish eka enniut. Nishunashkuatein, nituteti nishunashkuatei-massina, mishta-minu-tshishikau. Ekue petuk auen tiepuashit : ‘Napaien’, shukᵘ minutakussu. Eukuannu nimushum etshe netuapamit tshatutet. Eshpish mishta-papamuteian nete nutshimit, apu nita tshekuan matenitaman. Anu ute innu-assit nikushtatshiti anite peikuau.

Ninatassikumanenan an Shenum mak nin nete katakᵘ, ekue petutshit nutaui tiepuet, tshekat nenu natuashtau ushkat, eukuannu nenu uitshikun ka mashkanit. Nitshiuetanan nete uatshinanunit ekue tshituashkuaikannit ushkat eukuannu uet tshi minuanit. Shenum tutamᵘ mishtikua, innashta. Tshituashkuaikannu, titipapitakannu nenu ushkat, apu matshipannit. Niashipenanut, ekue itaunakanit nete Uepimishkat, tshetshi akunikannit. Apu tshekuannu tshi tutaminiti natukunisha, tshimishta-innishinauashapan ma kie iu itakanu natukunish, nenu uet tshi tutamuekᵘ tshetshi eka unitat ushkat itakanu nutaui.

Uauineu aueshisha ka taniti kie ka itashiniti ueshkat mak ka ishi-uapamat anite pessish uinipekut kie nete nutshimit : mashkua, atikua kie ashit musha. Anitshenat atikuat tapanat anite pessish ekᵘ anutshish apu taht, minashkuau-atikuat mishta-uitshitipanat kie uinnupanat. Uauineu etenitakushiniti atikua kie musha, tan e aitiniti miam uashakuniti. Mishta-tshikamakushu an iteu, uashakuti. Apu animatshenitakushit atikᵘ e tshitutakanit : peshuetamᵘ, kuishkᵘ nateu auennua. Etataui anite napetikᵘ kie ishkuetikuat nasht apu kushtatshit napetikᵘ kie ne iapit nepakaniti ishkuemush apu tshitishimut ne napemush. Mush ashit apu kushtatshit ekuan ekue natat auennua. Masten, ekue tipatshimut ka natauht, musha ka uapamaht kie ka nipaiaht.

Nete itetshe Unaman-shipit menu-tshissenitaman iu : pakatakana, shipua kie nipia. Uauitamᵘ eishinikatakannit tanite ka aitutet ueshkat. Mitshet aishinikatakanua neni nipia, shipua kie pakatakana. Nete itetshe etutakaniti anutshish ushkutima, takuan anite nikuashkan, kukuminash an itakanu. Natuenitamupan tshetshi aimituakanit auen kueshpiti. Anutshish tutakanua anite ushkutima. Nishatshuapatenan ne ashit kauashtenimanitshesht. Ekue itak : « Apu ut natuenitak nenu tshetshi nissipanakanit ne kukuminash ». Tshika nashipeshtakanua ushkana nitikᵘ, nuitamuau etenimak, iteu. Ne mashten tshe takuak ushkutim iu, tan nipa tshi nita iteniten tshetshi takuak anite ushkutim, ekute anite nipapimutetan, iu.

Eshe tapanat anite uiapamituht, mianitekatatuht innuat : tshishe-shatshiunnuat, uashaunnuat... Mashkuanut ishinikateu nete, tapanat innuat. Takuannipan aiamieutshuap, miam ne Ekuanitshit aiamieutshuap eshinakuak. Tshaun Manune tutamᵘ mak nimushum nana Tshu Muanan eukuan an uitshieshapan etutaminiti aiamieutshuapinu. Pikuaimupanat nene, ui tshieueutapananat nenu tshetshi tshimatat nete utassiuat, atshinu nene pikuaimuat. Takuannipan anite ashit nikuashkan. Mashkuanu-ataunnu tapan anite mashkuanut, uin kanapua tshipa uaueshtapan aiamieutshuapinu kie nenu nikuashkannu, uenutishikupan kanapua ne ataunnu. Kassinu anite pimishinuat mitshet innuat nete nikuashkanit kie ekute pimishinitshe nimushum Tshu Muanan.

Anite itetshe ut Ekuanitshit ueshkat kueshpinanuti, neme Patamu eukuan nataikanipan. Ne ashukan ka takuanua. Tan tshipa tshi nita tshi itenitamᵘ auen tshetshi pimamut anite meshkanau, tshetshi pimipanit anite utapan. Mitshenipani pakatakana, mishta-pitshaua neni passe kie passe pessua. Autakanua matshunisha, uiushinanu ekue matapeshtakanit. E ma mishta-aieshkushit auen, iapit iakushiti auen, peikuan eukuan eshitshimenanut. Ekᵘ anutshish nasht apu tshi matshit auen e aititi, iakussiti. Ekᵘ ma ueshkat, apu ut ishakuak an.