Atanukana mak tipatshimuna

Ka inniut nete nutshimit Utauia nenua tshishkutamakushapan tshetshi nataut miam nenua amishkua kie ma kutaka aueshisha. Mitshet aueshisha natauipan, niaiepan mashkua nanikutini ekue tutuat mashku-pimia. Kassinu anite aitutepan kassinu papamutepan. Kie mitshet innuat uapamakanipanat innuat nutshimit, uashaunnuat, tshishe-shatshiunnuat kie Utshimassit innuat. Ueshkat mishta-mitshetipanat atikuat apu taht anutshish. Mishta-natauipan ueshkat, apu tshi nataut usham shash tshishenniu. Tanite apatshiakanu nishkitu tshetshi kushpinanut kie nataunanut. Utauia nete tanishapani e mushuanit assinu ekue kasseueniti nete Tshishe-shatshit eku uin nete inniuishapan Pakut-shipit. Kassinu unatau-assinit utauaia aituteshapan, nuash nete kaiassimeua etaniti. Nenu ashit ka aitatusset, uashuapan kie mishta-nipaieshapan utshashumekua. Eukuannu nenu iashu-patshitinak utshissenitamun, tshetshi tshissenitaminiti auassa. Eukuan ishinniuipanat ueshkat.

Uauitamᵘ Mitushapeu tan ka aitatusset. Uauitamᵘ ashit ka ishpish patshitinak utipaikan e uauitshiat auennua mak ka minakanit tshishtapashunnu tshetshi tshissinuatshitakannu ka aitit.

Tipatshimu Mitushapeu ka kushpit euassiut, kupanieshiuishapan uessinitshishiut. Uauitamᵘ tan ka aitatusset. Eshpish mishta-minuenitaminiti utshimama, ekue minikut tshekuannu natshishkᵘ tshe apashtat.

Nete nutshimit mishta-shiuennanishapan neme pipun 1941: pineu apu tat, uapush kie, namesh apu kutak. Napaiamiananut, mukᵘ peik pineu muakanu, nishunnueshinanu ma. Uauitamᵘ ashit Ben Mckenzie tan ka aitinanut napaiamiananuti nete nutshimit. Shash nenu uauapatamᵘ innu tekuatshinnit tanite tshe natshi-nipaiamiat.

Utshismashkueu Jourdain tipatshimu ueshkat ka shiueniht uin, unapema kie utauassimuaua. Ushikushinua unapema, animunua. Apu tshekuannu nipataht. Ekue tshek nenua unapema ekue tshiueniti, nashipenua. Tshitapameu unapema tshiaueniti mak nenua utauassima apu shapishiniti, minieu mani nipinu. Tshek ma ekue nipaiat pineua ekue tshi apishish ashamat auassa tshetshi eka akushiniti. Ashuapameu unapema, nipitshe nana itenimeu. Ui tshiueu kie uin nete innu-assit. Miam tshipa tshituteuat ekue petahk tshekuannu. Tshekuannitshe!

Nuitshikuti tshetshi punitaian ne ianiminikuian nipi, apu tshi tutaman e peikussian. Aiamieun an nutshikuti tshetshi punitaian ne tshekuan.

Tipatshimu Ben Mckenzie ka tshitutet ut Schefferville nuash nete Fort-Chimo ashit utauia. Uauitamᵘ eshinikateniti passe anite ka itutet e innunikateniti mak e mishtikushiunikateniti.

Marie-Louise André tipatshimu. Shash mitshetupipuna eshpish uniat unapema, uin e peikussit nitautshinepan utauassima. Schefferville utshiu kie ekute eshkᵘ epit.

Mathias ishkueu innuipan nete Minaikut, nutshimit Pessamiu-shipit. Mashtenushan an. Nishuasht itashipanat, kutuasht napessat mak uin peikussu eshkueut. Atapipan nete Mani-utenam katshi nipaut ekue upinaht peikushteu auassa ashit unapema.

Nete Matimekush inniuipan Marie Mckenzie. Nishuaush-tatunnuepipuneshu ashu peikushteu. Nishuau nipau mak patetat itashinipani utauassima. Marie Aster ishinikatakanipan eshkuessiut. Pierre Aster ishinikashunishapani utauia kie Philomène Kenikuen ukauia. Nishinnua ushtesha kie peikᵘ umisha mak nishinnua ushima: peikᵘ ishkuessa kie peikᵘ napessa.

Mani-Anish nutshimit Nutashkuanit inniuipan, nete Pitapeu. Ukuma kanuenimikushapanat, apishissishipan nekatikut ukauia. Nishuau nipau, nishuaush itashinipani utauassima. Euassiut nete Ekuanitshit uenapissish kanuenimakanipan, nenua umushuma kie ukuma kanuenimikushapan.

Nete mitushapeu-paustikut inniuipan Paul-Arthur Mckenzie, nenu pipunnu 1937, nete nutshimit Uashat. Eukuannu nenu uet ishinikatakanit Mitushapeu, umushuma ishinikatakushapan. Monique Dominique uitshimepan, nishinua utauassimuaua.

Enen inniuipan nete nutshimit Nutashkuanit, nemenu 5 uashtessiu-pishimua 1931. Uitshimepan, Shenuma (Shenum Muanan) pipunnu 1948 mak peikunnu ashu kutuasht itashinipani utauassimuaua, peikunnu napessa mak kutuasht ishkuessa. Kutuasht-tatunnuepipuna ashu nishᵘ ishpish nipauipanat. Neunnu ashu peikᵘ itashinua ussima kie nishuaush-tatunnu utanishkutapana. Anutshish, uin an anu uet tshishenniut anite Ekuanitshit. Mishta-minuinniu kie eshkᵘ mishta-minu-aiatshiu kie mishta-ashitshiu anite innu-assit. Kussikuashu, massinitsheu mak atanutsheu.

Nete Unakamit inniuishapan Marie Desanges Élisabeth St-Onge, pessish Pessamit nenu pipunnu 1947. Kutuasht-tatunnuepipuneshu ashu peikushteu. Nutshimit nitautshinikushapan uikanisha, Côme St-Onge mak Monique Labbé-Desterres. Tanishapani ushtesha mak ushima mukᵘ euassiuniti nipinishapani. Nishinua Marie Desanges utauassima.

Shenum Pepineu nete Unaman-shipit utshipanu. Nemenu 2009, ka natshi-atanutshet, nishuaush-tatunnuepipuneshu ashu peikᵘ. Mishta-nitau-aiatshimu kie nishtuapatamᵘ atanukana, mishta-nitau-atanutsheu.

Napaien Muanan, nitishinikatakaun, nishuaush nitatunnuepipuneshin. Ninipauti mak patetat itashipanat nitauassimat kie tauat nussimat. Apu tshissenitaman tanite nipa utshipan: Muanan. Nutaui mak nukumesh Atuaniss mukᵘ nitshissenimauat, nete takupanat Pakut-shipit kie Unaman-shipit, ekute uetuteht. Tanite ututetshe nana nimushum Jos Mullen, nasht apu tshissenimak, nete Tshishe-shatshit kie ma Mishta-minishtikut put. Akaneshau uesh na nimushum. Nutaui Shinipesht ishinikatakanipan. Ekᵘ nana nikaui, Manakanet ekuanitshiushkueu nana uin. Nete Manitu-nipit nitinniuti, apu nashkuat katakᵘ anite Ekuanitshit. Peikunnueshipanat ashu peikᵘ nishteshat kie nishimat.

Uauinitishu Ben Mckenzie, uitamᵘ anite ka inniut, tshishikunu ka inniut mak ushtesha ka inniuniti.