Atanukana mak tipatshimuna

Ueshkat tshishennu an aiamiapan. Uin an uishamakanipan auassa enniunitaui, shutshishtamakanipan auass ekue uinakanit tshe ishinikatakanit Mani kie ma Shushep. Eukuan nanitam aitinanuipan.

Shashish innuat takuannikupan eshi-aimiaht. Atut shukaituakanuat miam anutshish. Ekᵘ ne e uauitakanit kushapatshikan, mishta-shutshishimakanukupan, ua natu-tshissenitakaniti tshekuan itapashtakanipan, tshishennuat nenu mukᵘ apashtapanat.

Mishta-apashtapanat aiamieunnu Innuat kassinu tshekuannu etutakaui. Apu ut nasht apashtaht anite manitushiunnu iu Mitushapeu. Mishta-aiamiapanat kie mishta-apatenitamupanat nenua tshishikua meshta-aiamiananuniti.

Mani tapueu Nutauinannu eshkᵘ eka tshitshipanit e tipatshimut.

Tipatshimu Mani aitinanunit auass nepiti nutshimit. Apu ut nikuashkatakanit nutshimit, nashipetaiakanipan.

Ueshkat, mamu aiamiananipan, pimutepan ne tshishennu niatshi-aiamituatshet nuash nete mishta-shipit itutepan.

Miam nakana ka aitiht innuat eshkᵘ eka tshitshipaniht etusseht, Enen aiamiau. Pakushenitamᵘ tshetshi minupannit tshe aitatussenanunit umenu kashikanit.

Uauitamᵘ Mani tan ka aitinanut apak etananuti.

Tipatshimu utshimashkueu Munik ka uapatak euassiut e kushapatakannit nete Tshishe-shatshit. Minu-uauitamᵘ ka aitinanunit eshkᵘ eka kushapatakannit mak mekuat e kushapatakannit.

Miam Nipaiamianan, mishta-apatanupan iapit ne kanishtuminashtakan.  Mishta-atussenanuipan, aieshkupinanuipan.  Ekute, katshi aiamianuti, ekue matapenanipan, tshitshipitinanipan.  Utshimashkueu Jourdain tipatshimu ka aitinanunit nete nutshimit, meshta-apatannit nenu e aitinanunit nenu e nishtiniti minashtakana, nikamunanu, mitshishunanu ekue nashipenanut.

Uapikun-pishimua tapan kauapikuesht. Aieshkupinanipan, tutakanipani matshunisha, akunishkunitshenanipan.

Uauitamᵘ Mani apishish eshinakuannit nenu kushapatshikannu. Uapatamushapan peikuau e tutakannit.

Apu uapatamukue uin kushapatshikannu, nenua ushkat unapema Pien uapataminishapani. Mukᵘ tshiam mishtikuai apashtakanipan etutakaniti kushapatshikan. Anutshish, mukᵘ tshiam ka teueitsheuti etaht.

Mekuat tekuakapinanut, nipaiakanu mashkᵘ ekue tutuakanit mashku-pimi. Kakua ne peikᵘ nipaieu, ekue minuat tshi mitshishuht. Ekute tshe nipaiamiaht. Tepishkanit, aiamiananu, minekash aiamiananu kie nikamunanu. Uapatakanuat mishta-mitshet atikuat, miam meshta-mitshetitaui, mukᵘ shakautikuat anat eshapanat. Mishta-minuatamuat anite etaht utassiuat. Shiakuannit ekue nashipepitshiht.

Eshe tapanat anite uiapamituht, mianitekatatuht innuat : tshishe-shatshiunnuat, uashaunnuat... Mashkuanut ishinikateu nete, tapanat innuat. Takuannipan aiamieutshuap, miam ne Ekuanitshit aiamieutshuap eshinakuak. Tshaun Manune tutamᵘ mak nimushum nana Tshu Muanan eukuan an uitshieshapan etutaminiti aiamieutshuapinu. Pikuaimupanat nene, ui tshieueutapananat nenu tshetshi tshimatat nete utassiuat, atshinu nene pikuaimuat. Takuannipan anite ashit nikuashkan. Mashkuanu-ataunnu tapan anite mashkuanut, uin kanapua tshipa uaueshtapan aiamieutshuapinu kie nenu nikuashkannu, uenutishikupan kanapua ne ataunnu. Kassinu anite pimishinuat mitshet innuat nete nikuashkanit kie ekute pimishinitshe nimushum Tshu Muanan.

Ituteshapan ueshkat Mani anite matutishanit. Apu aitinanut anutshish miam ka aitinanut mishkut iu.

Ushtesha mishta-nitau-aiamianipani. Nishᵘ tshishennua tshishkutamakushapan e aiamiat.

Ueshkat innu mitinikashauepan kakua, uapusha utinikannua. Ekute ut tshissenitamupan aitunnu. Mishkutshipanu ne ka aitunanut.

Nanitam nutshimit nipaiamiananipan ueshkat. Mishta-aiamiananipan. Mitshishunanuipan katshi tshishi-aiamiananuti.

Nete nutshimit mishta-shiuennanishapan neme pipun 1941: pineu apu tat, uapush kie, namesh apu kutak. Napaiamiananut, mukᵘ peik pineu muakanu, nishunnueshinanu ma. Uauitamᵘ ashit Ben Mckenzie tan ka aitinanut napaiamiananuti nete nutshimit. Shash nenu uauapatamᵘ innu tekuatshinnit tanite tshe natshi-nipaiamiat.

Tipatshimu Marie Mckenzie tan ka aitinanut neme tshe nipaiamiananut mak tshekuan etutakanit neme tekuaki Nipaiamianan.

Eshpish tshissitutak Munik, shashish ut ishi-aiamiaht innuat. Uauitamᵘ eshinakuanniti aiamieu-mashinaikana.

Teuiekan minu-apatshiakanipan kie mishta-ishpitenimakanipan. Uitshiuepan tshetshi tshissenitakannit anite etaht atikuat.

Utshimau Poker utamueu ashit teueikana, umushuma nenua minikushapan uteueikanua. Nanitam apatshiepanat innuat teueikana, tshetshi minupaniht netautaui kie ma ueshtamakannanuti, kie ma eitatussenanuti. Anutshish muku tshiam tshetshi minuinniut napeu. Utauia iapit utamuenipani teueikana kie tshishkutamatshenipani.

Ka ishi-tapueienitakanit ueshkat, ne tshe ui nakatuenitakanit e aitinanut nete nutshimit etananuti. Mate apu nita shatshuapamakanit auen meshakati, tshipa tshi pimutakuatikᵘ inanu kie ne kutak apu nita pushtashamenanut pitukamit. Kassinu nenu tshipa ui uitamuakanuat auassat. Ekᵘ anitshenat ka nataushiht, tshika ui nakatuapatamuat, apu tshika ui nanapeut, natiku nenu unataun itakanu kie ma tshipa tshi akaunamuakanu tshekuannu tshetshi eka nipatatshet. Papakassikᵘ eukuan an ka tipenitak, atikᵘ an, eukuan an etutak nenu. Ekᵘ ne missinakᵘ, namesha anite tipenitamᵘ. Nahi tepenitak, eukuan an tshatapak tshekuannu.