Atanukana mak tipatshimuna

Mani-Anish nutshimit Nutashkuanit inniuipan, nete Pitapeu. Ukuma kanuenimikushapanat, apishissishipan nekatikut ukauia. Nishuau nipau, nishuaush itashinipani utauassima. Euassiut nete Ekuanitshit uenapissish kanuenimakanipan, nenua umushuma kie ukuma kanuenimikushapan.

Ushkat utaumau nipauiuepan. Shash tshi nipaunishapani nenua napeua uatshimatinakanit. Akushinua unapema, nete nutshimit nepiniti. Neunua utauassima. Minuat katshi nishupipuna nipiniti unapema ekue kau nipaut, nenua uitshimeu Napaien Uapishtan, nishtunnuepipuneshishapan ashu kutuasht. Minu-utinenua utauassima ka taniti, neunipani kutaka utauassimuaua katshi uitshimat Napaiena.

Apu ut ishpaniht tshekuannu innuat. Kassinu eukuan ishinakushinanipan. Mukᵘ ne auen ka nipatatshet minu-mashaimuakupan ataunnisha, nete Nutashkuanit, Ekuanitshit. Nutshimit kie takuanipani atauitshuapa. Innuat tutamupanat ashit umashunishimuau. Uauitshitunanipan. Ne auen eka ka mashinaimuakanit, uitshikupan kutaka innua, mitshiminu, patshuianu tshetshi tutak umashunishima.

Nakatuapatakanipan e aitinanut katshi nipatatshenanuti. Miam mate, apu nita pitukaiakaniht ashamat pitukamit. Mishta-minuashipan nete ueshkat etananut, uikannipan mishim, anutshish apu ishinakuak, mishta-ait itenitakuan. Nimishta-mitaten nanikutini tshekuan eshinakuak, ne e aitutakauiakui, mishta-minuashipan ueshkat.

Apu uapatamukue uin kushapatshikannu, nenua ushkat unapema Pien uapataminishapani. Mukᵘ tshiam mishtikuai apashtakanipan etutakaniti kushapatshikan. Anutshish, mukᵘ tshiam ka teueitsheuti etaht.

Peikᵘ an nussim mukᵘ tshiam mishtikushiu-aimu. Ekᵘ ninan, ne nukum mukᵘ nitinnu-aimikutan. Apu ut uapamatshiht mishtikushuat nete ueshkat. Nimishta-natutuatan ninan aimiti nukuminan.

Ueshkat tshishennu an aiamiapan. Uin an uishamakanipan auassa enniunitaui, shutshishtamakanipan auass ekue uinakanit tshe ishinikatakanit Mani kie ma Shushep. Eukuan nanitam aitinanuipan.

Tapan an tshishennu tshe uitak tshe aitinanunit, mishta-uitshiaushipan, uin an natauipan anite pessish. Nimushum nipaipan mani uapusha. Ne uapushuian nitshi tshishaunikutan shakatshiati. Nukum kussikuatamupan nimatshunishiminana.

Takuannu tshekuannu iapatannit tshetshi uitamuakaniht auassat, tshekuan e aishpaniti : shiuenanuti kie ma iakushiti auen. Tshikatueuakanu mishtikᵘ ekue tshimanakanit anite ianimunanuti, tshetshi tshissenimakaniht e aitiht.

Anutshish, apu ishpish tshekuannu uitamuakaniht auassat: eka manenim auen, eka utamu auen… eukuan ninan nitshishi-tshishkutamakautan, nuitamakautan tshe aitiat ninan.

Katshi nipiniti ukuma kie umushuma ekue kau tshiueut nete Nutashkuanit. Mitshetuau natshishkamᵘ tshekuannu eka menuanit, miam mate ka uniat utauassima. Nishtuapatamᵘ nenu mueshtatenitamunnu. Uikanisha uitshikushapan tshetshi kau tshi aitit.

Utaumau mak ukaumau ueshkat uaueshtapanat tshetshi nipauiaht utauassimuau. Peikuau mukᵘ tshiam kauapikuesht tapan nete Mashkuanut. Anutshish apu ishinakuak an, apu apatenitakanit. Tauat passe auenitshenat tshanuemituht kie uatapamituht. Tau anutshish kauapikuesht mukᵘ aiat apu aiamiananut.

Nishiuenitan nete peikuau. Nukum Nenikutesh ishinikatakanipan nuitshimatan. Nishiuenitan, nishiuenan apu tshekuan takuak tshe mitshinanut. Mitshetipanat auassat anite etaht anutshish shash nananat apu taht. Tshek ma anite ekue nipaiakaniht atikuat, peikumitashumitannu atikuat. Metat ekue mishta-ishpannanut mitshim, nishuasht nitatukamitshishunan. Ekue nashipepuniat. Nimishta-minuateti etaiani nutshimit, kassinu ne ka aitiat ueshkat.

Nipeteti shashish e uauinakaniht anitshenat uapanatsheuat, apu nita matenimakau nin. Matenitamini tshekuan, eukuan tshe eka minupanin, kassinu tshekuan uitamatshemakan. Pietamini tshekuan eukuan tshe ishpanit tshekuan. Unataun nenu auen itakanu uet tshi uitamakut nenu tshekuannu, namaienu nenu umanitushiun.

Nanitam tshekuan ashamitunanuipan nepatakaniti kie uauitshitunanuipan miam auen iakushiti. Uipat kushpipanat auenitshenat eka tshekuannu matshitaui innu-assit. Auen nepatatsheti, kassinu auennua tepaueu etashiniti. Nutim tshekuan ashamitunanuipan.

Nutshimit etananuti, minu-uitamuakanipan tshekuannu ueshkat ishkueu, mishta-apatishu etati. Kassinu aitatussenanuipan nete nutshimit : e kussikuashunanut, e maushunanut, e massinitshenanut. Kassinu tshekuan apatanipan, mate massinitshenanipan kie ne apatanipan utashtishimeukᵘ, pashakanipan, eukuan an usheshtakuiapimikashunanipan.

Eukuan an atimᵘ tshitshue kueshapatak itakanu, uin an metshitat aueshisha tshetshi nipaiakaniti umushuma. Anite atanukanit nititatshimushtakuti mani nimushum : maikan ka ui atimut. maikan itiku atimua, shiuenini, eukuan an tshe mut tshimushum ekᵘ nin, ekuan tshe nipian anite nipiti.

Mishta-kashekauat kueshpitakanitaui anitshenat auassat tsheshkutamuakanitaui innu-aitunnu. Mishta-natutamuat uatamuakanitaui tshe aitutuaht aueshisha. Tan tshe aitiht natautaui, mishta-akua tshika ui tutakanu. Mishta-akua tutuakanu napeu netauti, umatshunishima tshe ishinakuaniti. Mishta-ait itenitakuan anutshish.

Nituten mani innu-natukuna kenuenitamani. Anutshish, apu tshi nataman mak apu tshi tutaman eka kenuenitamani. Eukuan tshipa ui aituat auassat. Apu tshissenitahk tshekuannu. Mate, tshipa minuanu tshishkutamuakaniht tshetshi ussimiht, tshetshi uitshiaushiht ishkueua uiapamaushuti. Mitshetipanat ishkueuat natau-ussimiht, tshipa minuanipan tshishkutamuakanitakuenat auassat.

Uapikun-pishimua tapan kauapikuesht. Aieshkupinanipan, tutakanipani matshunisha, akunishkunitshenanipan.

Mishta-nipatatshenishapani unapema, ekue shitshimetshe matshi ma minime tshikaui itetshe. Apu tapuetak, iteu. Ekue itetshe, apu nita tshika ut nutepanin an tshekuan, nishtam tshinataun tshika nutepan. Iakushit ma anite iteu, miam kai-ishin Mani-Anish! Eukuan eshinakuak itikutshe, apu tshi nataut. Tshika nataun an eshkᵘ itetshe kanapua, eshkᵘ tshika minuinniun tshe natauin, tshe ashatshein minuat.

Mishta-kashekauat napessat kueshpitakanitaui, mishta-minuatamuat nutshimit etataui. Mukᵘ anite pessish shash tshipa mishta-minumatshiuat nenu. Tshipa ui apatenimakanuat auassat, tshetshi eka mukᵘ mamitunenitahk tshetshi matshi-tutahk.

Mishta-nishtutamᵘ an auass uatamuakaniti tshekuannu. Tshika ui tshishkutamuakanuat tshetshi ishpitenimituht. Tshika ui nakatuapatenan tshinanu tshe ishi-uitamuakut tshitauassiminan

Tshika ui aimiakanu auass tshetshi nishtutak tshekuannu. At e tshisheuatishinanut, peikuan iapit tshika ui tshitaimuakanu auass eka menu-tutaki. Napien kie kamatshikauat an, eukuan eka menuat. Mishta-akua tutakanipan ueshkat, tshika ui minu-ishpaniaushunanu. Uitshiakanipan auen eka eshpaniti mitshiminu. Eukuan ishinakuanipan ueshkat.

Tshipa ui ashitshikuakanu auass tsheshkutamuakaniti, tshetshi shapenitak tshetshi tshishkutamuakanit. Shash tshipa aieshkushtenu tshekuannu tshe mitshit tshetshi tshissenitak iapatenitakushit. Tshika ui nanitam mishta-nakatuenimauat tshitaussimat nitikuti, mitshet tshishennuat nuitamakutiat, at ma mishta-ait anitshenat innuat anat.