Atanukana mak tipatshimuna

Innu-auass an Aiashess. Kanuenimiku utauia ekue nakatikut minishtikut. Aiashess ekue tshitutet, nanatuapameu uikanisha.

Peikᵘ etashtet: Aiashess nakatiku utauia minishtikut ekue natakamaunikut uteshkan-manitusha.

Nishtina tshe natutakaniti tshetshi nutim petakanit ume atanukan.

Nishᵘ etashtet : Aiashess natuapameu kukuminasha ekue uitamakut tan tshe aitit tshetshi natat uikanisha. Mitshet tshekuannu tshika ui shaputueshkamᵘ eshkᵘ eka utitat uikanisha.

Nishtᵘ etashtet : Aiashess nutim tshi shaputueshkamᵘ nenu ka nakashkakut ekue tshi utitat ukauia mak utauia. Eshpish aikamikut utauia, ekue utamuat uteueikana, ekue pashtenit assinu, ishkuatenu. Aiasheu upimim apatenu ekue shakaikanipeianit. Uauitakannu tshekuannu mak aueshishat uinnuht anite uiauat.

Uauitamᵘ utinninun Cécile Bacon.

Mathias ishkueu innuipan nete Minaikut, nutshimit Pessamiu-shipit. Mashtenushan an. Nishuasht itashipanat, kutuasht napessat mak uin peikussu eshkueut. Atapipan nete Mani-utenam katshi nipaut ekue upinaht peikushteu auassa ashit unapema.

Nete Unakamit inniuishapan Marie Desanges Élisabeth St-Onge, pessish Pessamit nenu pipunnu 1947. Kutuasht-tatunnuepipuneshu ashu peikushteu. Nutshimit nitautshinikushapan uikanisha, Côme St-Onge mak Monique Labbé-Desterres. Tanishapani ushtesha mak ushima mukᵘ euassiuniti nipinishapani. Nishinua Marie Desanges utauassima.

Atanutshenanu, tipatshimakanu ka inniut Tshakapesh, tanite uetshipanit. Katshituashkua (Matshi-katshitushkuan) nipaienishapani nenua utauia kie ukauia. Katshi naipamat ukauinua kie utauinua, ekue uepimitak nete upime ushpaiua. Ekute anite pietakushit Tshakapesh, ka mataka. Umisha kanuenimiku mak mishta-tshinipinitautshu. Mishta-minuatamᵘ e metuet ashit atshapia kie akashkua, ui natshi-niapaieu nenua ka nipakaniti uikanisha. Katshi katshitinat ekue nutenat, ekute anite meshkamuat upishkueunua ukauia. Aishkat ekue uapatak meshkananu, pishimua umeshkanaminu. Eukuannua nenua tshe ui katshitinat tipishkau-pishimua. Katshi katshitinat, ekute enukushit pishimut, umisha ashit uitapamiku.

Mitshet aueshishat utshimau-aimuat. Uauitamuat eshinakushiht mak eshi-uauitshiaht innua.

Ute uauitakanu tan ka aitatussenanut napaiamiananuti ueshkat. Uipat aieshkupinanuipan neme tshe nipaiamiananuti. Shash anite tshissenimakanipan tanite tshe utinakanit ne tshishtapakun tshe tshimikauakanit. Tekuatshiniti, shash mani mamushatshinakanipani minisha tshetshi tutuakaniht tepateuat. Mitshet tshekuan piminuenanuipan, mitshet tshekuan ashtakanipan teshipitakanit: amishkᵘ, atikᵘ, uapush mak pineuat. Mita tutakanipani, kassinu anite naikakanu uashka. Uikutinakanua matshunisha ka mishta-minuashiti, mishta-minuashpititishunanu. Minuenitakuanuipan e tataui uikanishimauat anite patshuianitshuapit.

Kuekuatsheu pimipitshu, ui nashipeu. Eshinakushiniti mishtikua tshitapameu tshetshi mishkak umeshkanam nuash uinipekut.

Shiuenu Kuekuatsheu. Nanatuapatamᵘ tan tshe ishi-uieshimat aueshisha tshetshi mitshishut. «Nipetan nipin» iteu aueshisha tanite ueshkat inanu, nanitam pipunishapan.

Miam Nipaiamianan, mishta-apatanupan iapit ne kanishtuminashtakan.  Mishta-atussenanuipan, aieshkupinanuipan.  Ekute, katshi aiamianuti, ekue matapenanipan, tshitshipitinanipan.  Utshimashkueu Jourdain tipatshimu ka aitinanunit nete nutshimit, meshta-apatannit nenu e aitinanunit nenu e nishtiniti minashtakana, nikamunanu, mitshishunanu ekue nashipenanut.

Tipatshimunanu ka ishinakuak ne innu-assi, Uashau, eshkᵘ eka takuak ne utenau Sept-îles.  Utshimashkueu Clara Jourdain tipatshimu ka aishpannit nete ueshkat. Mitshetipanat anite innuat etaht anite Uashat, manukatishupanat. Peikᵘ anite iu, takuaikan ishinikateu nenua ka takushiniti, nete uetuteniti tshishe-utshimat, natshi-uitamakuat tshe atanakaniht nete Mani-utenam. Utshimashkueu Jourdain, tshissitutamᵘ ka aishpannit, ka tipatshimushtakut nana umushuma kie uin ka ishi-uapatak, eukuan ishinakuanupan iu utshimashkueu Clara Jourdain.

Tipatshimu Ben Mckenzie tan ka itenitakuannit etananunit ishkanipipuna uinipekut, eka kueshpinanuti.

Uauitamᵘ Ben Mckenzie nenu niashipenanunit, tan tat kapatakana tekuaki nuash eshpish takushinnanut anite uinipekut.

Uauinitishu Ben Mckenzie, uitamᵘ anite ka inniut, tshishikunu ka inniut mak ushtesha ka inniuniti.

Utshismashkueu Jourdain tipatshimu ueshkat ka shiueniht uin, unapema kie utauassimuaua. Ushikushinua unapema, animunua. Apu tshekuannu nipataht. Ekue tshek nenua unapema ekue tshiueniti, nashipenua. Tshitapameu unapema tshiaueniti mak nenua utauassima apu shapishiniti, minieu mani nipinu. Tshek ma ekue nipaiat pineua ekue tshi apishish ashamat auassa tshetshi eka akushiniti. Ashuapameu unapema, nipitshe nana itenimeu. Ui tshiueu kie uin nete innu-assit. Miam tshipa tshituteuat ekue petahk tshekuannu. Tshekuannitshe!

Ishkueuat ka ishinakuannit ueshkat utatusseunnuau Eshuapamaushuti ishkueu, tshika ui nashatsheu mukᵘ e aitinanunit nete kueshpinanuniti. Nakauinanuipan tshetshi uapamat utauassima shash ekue tshatshipitinanuti ekue tshitutet kie uin. Ute, tipatshimakanu ka inniut Marcel Jourdain. Miam nenu shiuenanuipan. Apishish tshika ui mitshishu ne ukaumau tshetshi tshi ashamat nenua utauassima. Eukuan ishinakuannipan ueshkat nutshimit.

Innuat nenu tutamuat atanukana tshe tipatshimushtuaht utauassimuaua tepishkaniti pepunniti. Uauitamᵘ Ben Mckenzie tshekuannu nenu uet tutuakaniht auassat.

Ueshkat, apu ut minakaniht tshetshi taht auassat anite pessish menuinniuti ishkueua nutshimit. Tshitishauakanipanat tshe ishpish minuinniuniti nenua ishkueua. Ben Mckenzie tipatshimu ka tshitishauakaniht peikuau euassiut.

Ben Mckenzie uitamᵘ auen ne Kuekuatsheu mak tshekuannu uet eka tat anutshish.

Ka ishinakuannit utinniun mak utatusseun ishkueu nutshimit e ashuapamaushuti. Menuinniuti tepishkanit, shaputue ekue unit uiapannit ekue pimutet kie uin. Apu ut minekash nakauikanut ishkueu menuinniuti.

Innu minuatamᵘ e kushpit, eukuan nenu utinniun. Ben Mckenzie uauitamᵘ tsheku-mitshiminu tshetutakannit kueshpinanunit. Uauitamᵘ ashit tan ka itashiniti auennua mamu e kushpiniti.

Ben Mckenzie uauitamᵘ eshinikateniti pakatakana tekuanniti Mishta-shipit, nete itetshe Labrador City. Uineu ashit eshi-taniti namesha nete shipia mak shakaikana.

Tipatshimu Ben Mckenzie ka tshitutet ut Schefferville nuash nete Fort-Chimo ashit utauia. Uauitamᵘ eshinikateniti passe anite ka itutet e innunikateniti mak e mishtikushiunikateniti.