Atanukana mak tipatshimuna

Nete Matimekush inniuipan Marie Mckenzie. Nishuaush-tatunnuepipuneshu ashu peikushteu. Nishuau nipau mak patetat itashinipani utauassima. Marie Aster ishinikatakanipan eshkuessiut. Pierre Aster ishinikashunishapani utauia kie Philomène Kenikuen ukauia. Nishinnua ushtesha kie peikᵘ umisha mak nishinnua ushima: peikᵘ ishkuessa kie peikᵘ napessa.

Netshishkatutaui innuat nete Minaikut, mamu mitshishupanat, niminanuipan. Minuenitakuanipan.

Eshkᵘ eka kushpiht ashuapamituat, passitsheuat tshetshi uitahk etaht anite kie ma tshetshi uitahk tekushiniht.

Kueshpinanuti, utinakanu peikᵘ innu tshetshi kapitenut. Uin nenu tshika uitamᵘ tan tshe aitinanunit. Utiniku innua usham shutshenimiku kie kassinu natutuakanu.

Pepuk peikuau, ninashipepitshitan, apishissishipan nishim Pinamen. Nanitam kusseu Napessish. Eshakumitakussiniti peshueu namesha tshetshi mitshishuniti ushima. Manaikannu upimim ne namesh tshetshi ashamakanit ne nishim Pinamen. Nuash eshpish matapenanunit takuannu umitshim ne nishim.

Nishtesh natuenimepan upashtamakana eshkᵘ etaiat nutshimit. Mitshiminu nenu tshetshi petakannit uet natuenimat. Ekue ashit tshi nashipetaiakaniht nishtᵘ ishkueuat tshetshi natshi-minuinniuht uinipekut.

Uauineu utshimashkueu Mani e nishiniti ushtesha, mishta-tshishenniunishapani eka ka inniuniti. Peikᵘ ushtesha peikumitashumitannuepipunenishipani eka inniuniti nete nutshimit ekᵘ nenu kutaka, anite Mani-utenam apu inniunikueni.

Tipatshimu Mani aitinanunit auass nepiti nutshimit. Apu ut nikuashkatakanit nutshimit, nashipetaiakanipan.

Namaienua innua nenua utauia Mani. Nete Uapamekushtikut utshinua. Takushinnishapani ashit ushteshinua ekue taniti anite uinipekut ekue nipauniti.

Uauitamᵘ Mani apishish eshinakuannit nenu kushapatshikannu. Uapatamushapan peikuau e tutakannit.

Ituteshapan ueshkat Mani anite matutishanit. Apu aitinanut anutshish miam ka aitinanut mishkut iu.

Nutshimiu-mitshiminu mishta-tutamushapan ueshkat ashit unapema. Atiku-piminu mak pashteu-uiashinu mishta-tutamushapanat.

Uauitamᵘ Mani eshinakuanniti atusseuakana ka tutaminiti unapemipana.

Utamuenishapani teueikana unapema Mani. Utamuenishapani tshetshi tshissenimaniti anite etaniti atikua. Eukuan itapatshiakanipan teueikan, tshetshi tshissenimakanit anite etat aueshish.

Marie Mckenzie parle de la fabrication des raquettes. Elle parle d’une façon de tisser les raquettes qui n’est pas recommandée. Elle raconte une anecdote sur ce sujet.

Tipatshimu Mani ka petakannit peikuau mitshiminu anite uatshiht. Ushtesha natuenitaminishapani. Mitshetishapanat anite ka utishkuemiht, mishta-minuenitamushapanat pietakannit mitshiminu.

Utshimashkueu Mani tipatshimu ka kushtat peikuau, nete nutshimit etat, tshetshi matenimat katshimaitsheshua. Matenimakannishapani anite pessish uatshiht.

Uauineu Marie Mckenzie Katshimaitsheshua ekue tipatshimat tshishennua ka matenimaniti peikuau.

Tipatshimeu umushuma Mani. Atussenitshapani atauitshuapissit nete Puatshishaimu ekue utitikuniti Katshimaitsheshua.

Uauitamᵘ utshimashkueu Mani ka ishi-takuanniti utshimau-atauitshuapissa nete uashka Matimekush mak nete Labrador.

Uauitamᵘ Mani eshi-uapatak innu-aimunnu. Unitan shash iu, mishkutshipanu kie apu ishi-innu-aiminanut miam ueshkat.

Uauitamᵘ utshimashkueu Mani uenitannit innu-aitunnu. Anite utassit, apu mitshetiht innushkueuat meshta-nishtuapatahk nutshimiu-aitunnu.

Mani mineu aimunnu auassa mak katshishkutamatsheshiniti innu-aitunnu uiauitakannit.

Marie Mckenzie nashkumeu ka uishamikut mashinaikanitshuapa Tshakapesh mak patshitinamᵘ mashten utaimun.

Tshitshue innushkueu au nin iu Mani. Nishtuapatamupan ka ishinniunanunit ueshkat mak mishta-mishanu utshissenitamun innu-aitunnu e uauitakannit.