Atanukana mak tipatshimuna

Nete mitushapeu-paustikut inniuipan Paul-Arthur Mckenzie, nenu pipunnu 1937, nete nutshimit Uashat. Eukuannu nenu uet ishinikatakanit Mitushapeu, umushuma ishinikatakushapan. Monique Dominique uitshimepan, nishinua utauassimuaua.

Mitushapeu uauitamᵘ tan eshi-akupituat pitshuatikua mak tanite e akupitumatshet. Uauitamᵘ tan eshi-utinat nenua pitshuatikua nete minashkuat ashit tshekuannu ma uet minuanit nenu innu-natukunnu.

Mishta-apashtapanat aiamieunnu Innuat kassinu tshekuannu etutakaui. Apu ut nasht apashtaht anite manitushiunnu iu Mitushapeu. Mishta-aiamiapanat kie mishta-apatenitamupanat nenua tshishikua meshta-aiamiananuniti.

Ueshkat innu animiuipan nete nutshimit etati. Apu ishinakuak anutshish, anu uetshiu.

Tipatshimu Mitushapeu ka utatshimikut ukauia eka menuinniunniti. Mishta-ushkuinipani ukauia peikuan kie mishta-atussenipani. Kassinu anitshenat ishkueuat mishta-atussepanat at shukᵘ eka menuinniutaui. Apu ne ishinakuak anutshish iu.

Mishta-apatan tshetshi natutuakaniht tshishennuat, tanite ekute uet tshi nishtuapatakaniti innuat utipatshimunuau.

Ueshkat uipat auassat ishi-ashamakanipanat nutshimiu-mitshiminu.  Anutshish nasht apu mitshiht nenu auassat, matshimatamuat.

Mitushapeu tipatshimeu aueshisha: Kassinu aueshish tshi natukuitishu itakanu miam ne kukamess. Apu nita tshika ut mishkuakanit aueshish e nipit, usham takuannu anite etutet ua natshi-nipiti ipanat tshishennuat. Tau ashit itakanu namesh meshta-mishishtit.

Uitamuakanuat eka enniuniti umisha pishimussa, upau-pishimua nenu apu inniunikueni.

mak

Apatannu tshetshi uitamuakanit ishkuess tshetshi nakatuenimitishut pemipaniti (utakushun).

Ueshkat, innu mishta-shatshikupan unataun, mukᵘ eshinakuannit tshekuannu iapashtati e nataut tshi nipatatshepan. Mak ashit, innuat nipaiepanat atikua mukᵘ tshe ishpish ishpaniht tshetshi mitshishuht. Minuenitamupanat nepaiataui peikᵘ kie ma nishᵘ atikua, apu anu ut nipaiaht. Anutshish, mishta-nipaiakanu atikᵘ. Apu ishinniunanut miam ueshkat.

Eshpish nanitam uiushit innu utush kueshpiti, ekue nitautshinnit anite tshekuannu utat ukueiat. Upakatakan nenu itakanu. Mishta-kushkushikuat anitshenat natukunishat uiatamuakaniht nenu.

Uitamuakanuat eka enniuniti umisha pishimussa, upau-pishimua nenu apu inniunikueni.

mak

Apatannu tshetshi uitamuakanit ishkuess tshetshi nakatuenimitishut pemipaniti (utakushun).

Tapanat anite innuat uetshimauht, uinuau e kapitenuht. Uitshieuat innua ianimuniti, uauetashumeuat auennua.

Uapatiniueu Mitushapeu mishtikunu ka apashtaniti innua tshetshi uapataminiti katakᵘ. Tshiam an mishtikᵘ, apu auat pakuneiat. Mishta-katakᵘ anite uapamepanat aueshisha innuat nenu iapashtataui. Anutshish, apu apashtakanit, aiauat tushkapatshikana meshta-animanniti.

Ueshkat innu mitinikashauepan kakua, uapusha utinikannua. Ekute ut tshissenitamupan aitunnu. Mishkutshipanu ne ka aitunanut.

Kushkupanu natukunish e mishkamuat ashinissa anite nikauia utatshishinit katshi matishuat. Ekue uitamuakanit: pineua nenu e muat uet tshi takuanniti ashinissa uiat. Pishtaukukupan passikannu itenimeshapan. Tshissenitamupanat anitshenat natukunishat aitiniti tshiashi-innua.

Anutshish mishkutshipannu innu ka aitit ueshkat nete nutshimit, ka ishi-uauitshitunanut mishta-ait ishinakuan. Shuniau an tshipikunikunan.

Uauitamᵘ Mitushapeu eshpish mishta-minuanit nenu pineushitinu matshiti unishiniti auen minashkuat. Shaueniti, shushupitamᵘ nenu pineushitinu ekue tshi uitshikut tshetshi takushinit nete ua itutet.

Takuannu auass tshetshi uitamuakanit tshekuannu anutshish. Ueshkat mishta-katuakanipan e aishpanniti.

Ueshkat, Innuat mishta-tshisheuatishipanat. Kassinu auassa uauitshiepanat ianimuniti at shukᵘ eka ka tshinuemaht.

Ueshkat innuat uauitshitupanat muk^u ua aitatusseht ek^u anutshish apu shuk^u takuak ne uauitshitun.

Ueshkat, mamu aiamiananipan, pimutepan ne tshishennu niatshi-aiamituatshet nuash nete mishta-shipit itutepan.

Mitshetuait aitapatshiakanu atikuian : matshunisha tutakanua, teueikan mak pishakanessina. Mukᵘ aiat apu atusseshtakaniti neni eshkana kie ne atikᵘ. Mishta-anema tshekuannu atinamuat innuat, e aitinanunit mak aitutuakanit ne atikua.

Ne innu-mitshim, innu-aimun mak innu-aitun, eukuan iapatak tshetshi nikan ashtakanit, auassat tshe ui minakaniht tshetshi nishtuapamitishuht.

Minuenitamupanat innuat nepaiataui mashkua usham mitshetuait aitapatshiakanu mashkᵘ. Peikupipuna piminu kanuenitamupanat, mishta-uikannu kie uiash. Mishta-innishu mashkᵘ itakanu, nishtutamᵘ aimiakaniti mukᵘ takuannu nenu eshi-aimiakanit.