Atanukana mak tipatshimuna

Namaienua innua nenua utauia Mani. Nete Uapamekushtikut utshinua. Takushinnishapani ashit ushteshinua ekue taniti anite uinipekut ekue nipauniti.

Nanitam tshekuan ashamitunanuipan nepatakaniti kie uauitshitunanuipan miam auen iakushiti. Uipat kushpipanat auenitshenat eka tshekuannu matshitaui innu-assit. Auen nepatatsheti, kassinu auennua tepaueu etashiniti. Nutim tshekuan ashamitunanuipan.

Nete nutshimit nut tshishkutamakauitan, anitshenat kanataushiht mak kanapua nimushum Mishtikushish, ekute tshessinuapiat. Tshitutakanipanat napessat kueshpinanuti. Mishta-mishapan atushkan ueshkat eshkᵘ eka kueshpinanuti, tshe tutakaniti mitshet tshekuana: ashamat, utapanashkᵘ mak makanipakan...  Katshi nipauian iu, peikuau anite nushikushin netauian, tshekat nitshipatashkushin mishtikᵘ tanite mishta-kashti-tipishkau anite etuteian, tshaueian, iu. Ushkat atikua nepat e peikussit, peikunnuepipuneshikupan ashu neu kie ma ashu patetat.

Uauitakanu tan eshi-naushunakanit ne auen tshe kapitenut mak tshekuannu tshe tutak nemenu kushpinanuniti.

Tapanat anite innuat uetshimauht, uinuau e kapitenuht. Uitshieuat innua ianimuniti, uauetashumeuat auennua.

Ka ishinakuannit utinniun mak utatusseun ishkueu nutshimit e ashuapamaushuti. Menuinniuti tepishkanit, shaputue ekue unit uiapannit ekue pimutet kie uin. Apu ut minekash nakauikanut ishkueu menuinniuti.

Nete itetshe Unaman-shipit menu-tshissenitaman iu : pakatakana, shipua kie nipia. Uauitamᵘ eishinikatakannit tanite ka aitutet ueshkat. Mitshet aishinikatakanua neni nipia, shipua kie pakatakana. Nete itetshe etutakaniti anutshish ushkutima, takuan anite nikuashkan, kukuminash an itakanu. Natuenitamupan tshetshi aimituakanit auen kueshpiti. Anutshish tutakanua anite ushkutima. Nishatshuapatenan ne ashit kauashtenimanitshesht. Ekue itak : « Apu ut natuenitak nenu tshetshi nissipanakanit ne kukuminash ». Tshika nashipeshtakanua ushkana nitikᵘ, nuitamuau etenimak, iteu. Ne mashten tshe takuak ushkutim iu, tan nipa tshi nita iteniten tshetshi takuak anite ushkutim, ekute anite nipapimutetan, iu.

Ben Mckenzie uauitamᵘ eshinikateniti pakatakana tekuanniti Mishta-shipit, nete itetshe Labrador City. Uineu ashit eshi-taniti namesha nete shipia mak shakaikana.

Eshpish nanitam uiushit innu utush kueshpiti, ekue nitautshinnit anite tshekuannu utat ukueiat. Upakatakan nenu itakanu. Mishta-kushkushikuat anitshenat natukunishat uiatamuakaniht nenu.

Uauitamᵘ utshimashkueu Mani ka ishi-takuanniti utshimau-atauitshuapissa nete uashka Matimekush mak nete Labrador.

Katshi nipauht ekue kushpiht, katshi nipaianiti atikua unapema napinnit ekue nashipeht. Kau ekue kushpiht tekuatshinnit.

Neme pipun 1945, peikushteu innuat neshtuapaueshapanat nete Ashuanipit. Eukuan nenu tepatshimut Ben Mckenzie.

Ninatassikumanenan an Shenum mak nin nete katakᵘ, ekue petutshit nutaui tiepuet, tshekat nenu natuashtau ushkat, eukuannu nenu uitshikun ka mashkanit. Nitshiuetanan nete uatshinanunit ekue tshituashkuaikannit ushkat eukuannu uet tshi minuanit. Shenum tutamᵘ mishtikua, innashta. Tshituashkuaikannu, titipapitakannu nenu ushkat, apu matshipannit. Niashipenanut, ekue itaunakanit nete Uepimishkat, tshetshi akunikannit. Apu tshekuannu tshi tutaminiti natukunisha, tshimishta-innishinauashapan ma kie iu itakanu natukunish, nenu uet tshi tutamuekᵘ tshetshi eka unitat ushkat itakanu nutaui.

Uauitamᵘ Mani eshinikateniti kapatakana/pakatakana iapashtaht kueshpiht mak etenitakuniti kassinu.

Tapanat anite kakusseshiht/mishtikushuat nutshimit, katipaitsheht. Mishta-minuenitakushipanat, nakatamupanat umitshimuau niashipataui. Tipatshimu Mani ka mishkahk katipaisheshiniti umitshiminu anite nutshimit.

Innu minuatamᵘ e kushpit, eukuan nenu utinniun. Ben Mckenzie uauitamᵘ tsheku-mitshiminu tshetutakannit kueshpinanunit. Uauitamᵘ ashit tan ka itashiniti auennua mamu e kushpiniti.

Ekute innuat mamuitupanat tshetshi aiamiaht peikuau peikupipuna, nipauiakanipanat, shukaitaushunanuipan kie tumishkatukuenanuipanat. Ekute anite nepiniti umishuminua unapema ne Enen. Uitshiaushinishapani nenu napeua tshematakannit aiamieutshuapinu, miam anite Ekuanitshit ka ishinakuannua. Ekute ut mani kushpipanat anitshenat innuat katshi aitatussenanuti. Kassinu auenitshenat aieshkushtauat umatshunishimuau Tshekat nete shash tekuatshiniti, ekue kushpiht.

Ben Mckenzie uauitamᵘ nenu shakaikannu Matshi-nipi, anite kuakushuakanashkuat ka tshimashuht. Eshkᵘ anite Uepishtikueiau-assit tananu, ekᵘ neme pemutenanut pakatakan, shash nete tananu Akamassit/Labrador. «Takuan tshetshi ishpitenimakanit ne kuakushuakanashkᵘ, eukuan an ka uitshiuet tshetshi utitaikannit nenu shakaikannu» iu.

Kaianuet ui nipaieu nenua Meminitaieua, atshena ka nipaianiti innua nete nutshimit. Peikᵘ etashtet: Kaianuet kushpu ashit utishkuema mak utshishennima. Ui natshi-nipaieu Meminitaieua. Ekue tshitutet nete shakaikana, amishkua natuapameu ekute netuapamikut Meminitaieua.

Tipatshimeu kukuminasha Mishta-Pinamena. Uishamikushapan, ne kukuminash, utushima tshetshi natshi-mupit nete Uashat. Tshika tshiuetaiku nete Tshishe-shatshit tshishi-mupiti. Mishta-uipat tshituteu itakanu ne kukuminash, patush ma uetakussishikaniti takushinu anite ka uitshinanunit. Napeua mamishkut natiku ekue petshitatshimikut utapanashkut.

Mishta-atussenannikupan nanitam, mishta-atussepan auen. Ekᵘ anutshish nin, shash tshekat nishuasht-tatupipuna apu tshekuan tshi tutaman, mukᵘ nitapin, mukᵘ nimitshishun mukᵘ tshiam. Ueshkat nete nutshimit etaian, apu ut ishinakuak, nimishta-papamuteti, mishta-katakᵘ nitituteti. Mishta-kashtshi-tipishkapan tshaueiani. Mauat ma auen nita nika ut matenimau tshetshi nutshikut. Peikuau anite nitamishetshipan tanite mishta-kashti-tipishkau, tshissekau anite etuteiat. Nishtesh Mishen an nuitsheuau. Nitshiuenan an. Nasht pessish apu nukuak.

Nanitam nititatan nutshimit, patush katshi nipauian ekue pessish ute Ekuanitshit taian. Nutaui mak nimushum Mishtikushish kie ne nimushum Tamienish. Ninataunan : amishkua, atikuat. Piakuaiki nipissa, ekue nashipeiat. Nitepauananat nimushuminan Nuna mak Shushep. Nimanukashunan anite ekue mitshishunanut : atikuiash, pashteuiash, mupimenanu ashit. Ekue nashipeiat.

Netshishkatutaui innuat nete Minaikut, mamu mitshishupanat, niminanuipan. Minuenitakuanipan.

Uauitamᵘ Ben Mckenzie nenu niashipenanunit, tan tat kapatakana tekuaki nuash eshpish takushinnanut anite uinipekut.

Apu nita pimuteian tshetshi ituteian nete Tshishe-shatshit, muk^u mishta-pessish anite nut tshiuen. Takuanipan anite utatauitshuap Mishta-Napeu, ekute natakanipan mitshim, ekute uet tshiueian. Kassinu neni etamuti pakatan-meshkanaua ute pessish Ekuanitshit kassinu neni nimitimeshken.