Atanukana mak tipatshimuna

Nishtᵘ etashtet : Aiashess nutim tshi shaputueshkamᵘ nenu ka nakashkakut ekue tshi utitat ukauia mak utauia. Eshpish aikamikut utauia, ekue utamuat uteueikana, ekue pashtenit assinu, ishkuatenu. Aiasheu upimim apatenu ekue shakaikanipeianit. Uauitakannu tshekuannu mak aueshishat uinnuht anite uiauat.

Nishᵘ etashtet : Aiashess natuapameu kukuminasha ekue uitamakut tan tshe aitit tshetshi natat uikanisha. Mitshet tshekuannu tshika ui shaputueshkamᵘ eshkᵘ eka utitat uikanisha.

Utshimau William Mathieu Mark uauitamᵘ etenitak atanukana, tshekuannu ma uet atanutshenanunit mak nenua uet mishta-apatenitakuanniti. Kassinu anite innuat etaht ute tshitassinat atanutsheuat kie uinuau, tapishkut nenua ishinakuanua utatanukanuaua, aitshit aitueuat, ishi-tipatshimuat. Kie uinuau atanukueuat nenua Tshakapesha, Aiashessa kanuenimeuat kie nenua eishinikateuati Mishtapush.  Neni atanukana takuanupani, tshetshi tshishkutamakut nenua auass, tshetshi tshishkutamatishut kie tshetshi nishtutak eishinniunanunit.

Kassinu nishtuapatamᵘ utshimashkueu André eshinikateniti anite eshinakushit ne atikᵘ anite atamit. Kassinu tshekuan apashtakanipan iu, apu tshekuan uepinakanit. Auat ne umetshi mitshininanipan.

Mishta-shashish, apu ut nipik. Mukᵘ tshiam pipunipan. Auass nakatiku uikanisha anite matukapit, usham utikumu itakanu. Katshi tshituteniti ukauia mak utauia, mishta-mau apu tshimuet. Uapameu pietuteniti Atshena, shetshishu. Mukᵘ ma, nenua umushuma uitshiku, natutikumatiku ekue tshiuetaikut. Tekushiniht nete etaniti uikanisha, apu minuatikut nenua ukaumaua, Atshen ekue tshitutet. Eshkᵘ eka tshitutet, ekue itat “akua ma eka tshi tshimueuiekui mati ne nussim”. Nenu tshipa minuatamᵘ tshi pimutakuatat nipin-pineshisha. Ekue tshitutenanut inanu, natshi-nipinenanu. Ui tutuakanu auass tshetshi tshimuet. Mitshetuat auenitshenat tshatuteht netuapamaht nipina. Meshkuakaniht nipinat, tshika mamishkutshipanu nipin inanu. pipun-pishimuat. Kutuasht-tatupishimua tshika nipin kie kutuasht-tatupishimua tshika pipun. Tapue ma auass ekue pimutakuatat pineshisha. Tshek ma anite apu takushinit auass, natuapamakanu, mukᵘ umatshunishima takuanua. Akushiu anite mishtikut pineshish itakanu. Utinikushapan nana pineshisha, uishaushinua mak miam uetakunishkueunishiti eshinakushiti.

Auass nakatiku utauia kie ukauia usham utikumu. Atshena utitiku, natutikumatiku ekue tshiuetaikut nete etaniti uikanisha. Tekushiniht nete etaniti uikanisha, apu minuenitakannit pieshikut Atshena. Kau ekue tshituteniti. Uitamakuat Atshena tshe ui tshimueuiaht auassa, usham tshika mishta-manua. Tapue ma, mishta-mau auass eka uiapamat umushuma. Kassinu tutuakanu tshetshi tshimuet. Ui pimutakuateu nipin-pineshisha. Ueshkat anite assi muku pipunupan. Natshi-nipinenanu, mitshetuteuat aueshishat. Mitshet tshekuannu natshishkamuat, mitshet auennua tepaueuat. Tshek ma ekue mishkuakaniht nipinat, ekue tshi pimutakuatat auass. Eshpish nenu tutak apu uapamakanit nana, miam pineshish ishinakushu itakanu. Ne eshpanit, eukuan uet tshi tshissenimakaniht tshe itashiht pishimuat, tshe pipuk kie tshe nipik.

Mitushapeu uauitamᵘ tan eshi-akupituat pitshuatikua mak tanite e akupitumatshet. Uauitamᵘ tan eshi-utinat nenua pitshuatikua nete minashkuat ashit tshekuannu ma uet minuanit nenu innu-natukunnu.

Utshimashkueu André uauitamᵘ tan eshi-tshishinakanit atikuian. Utip nenu apastakannu, ekute ekutshimakanit. Nutim nenu uauitamᵘ e aitinanunit. Tshashiakanit, mishta-nussishu ne atikuian. 

Uauitamᵘ Mani eshi-uapatak innu-aimunnu. Unitan shash iu, mishkutshipanu kie apu ishi-innu-aiminanut miam ueshkat.

Nin mukᵘ tshiam nitinnu-aimin. Apu tapuetuakau nussimat tshetshi mishtikushiu-aimiht. Nutaui kie nukum mishta-nishtutamupanat kutaka aimuna. Mishtikushiushkueu nana nukum kie innu-aimipan mishtikushua muku mishtikushiu-aimiepan. Tshipa nishtutamuat innu-aimiakaniht nanitam auassat tshetshi eshkᵘ innu-aiminanut.

Ben Mckenzie uauitamᵘ eshinikateniti pakatakana tekuanniti Mishta-shipit, nete itetshe Labrador City. Uineu ashit eshi-taniti namesha nete shipia mak shakaikana.

Tipatshimu Ben Mckenzie tan ka itenitakuannit etananunit ishkanipipuna uinipekut, eka kueshpinanuti.

Eshpish nanitam uiushit innu utush kueshpiti, ekue nitautshinnit anite tshekuannu utat ukueiat. Upakatakan nenu itakanu. Mishta-kushkushikuat anitshenat natukunishat uiatamuakaniht nenu.

Uapatiniueu Mitushapeu mishtikunu ka apashtaniti innua tshetshi uapataminiti katakᵘ. Tshiam an mishtikᵘ, apu auat pakuneiat. Mishta-katakᵘ anite uapamepanat aueshisha innuat nenu iapashtataui. Anutshish, apu apashtakanit, aiauat tushkapatshikana meshta-animanniti.

Peikᵘ an nussim mukᵘ tshiam mishtikushiu-aimu. Ekᵘ ninan, ne nukum mukᵘ nitinnu-aimikutan. Apu ut uapamatshiht mishtikushuat nete ueshkat. Nimishta-natutuatan ninan aimiti nukuminan.

Tipatshimakanu kukuminash ka nipaikut utauassima pessish anite peikᵘ shipissinu, eukuan eshinikatenit nenu shipissinu miam ka ishinikashut. Uauitakanu ashit tshekuan ma eshinikatet ne pakatakan/kapatakan Kakatshat.

Mitshetuait aitapatshiakanu atikuian. Katshi tshishinakanit mak uishkushauakanit, pishakanassina mak akupa tutakanua. Ekᵘ ne e tshikassit ushakai, uashkashuakanu ekue tutakaniti pishakaniapia tshetshi assimenanut mak kushkanipia tutakanu. Ashtish ne uin, sheshtakuiapi itapashtakanu usham shukapekan. Mishta-mautapanat nenua kukuminashat.

Kuekuatsheu ashimiku uiashinu maikana. Anite ashtakannu uiashinu utapanashkut mukᵘ itakanu tshetshi eka tshitapatak. Miam nakana ka aitit, apu natutak etakanit.

   Mamauatshieshu ushimisha itakanu Kuekuatsheu, kassinu nenua aueshisha. Tshissenimeu tshe pimuteniti Uananuieua eshpish nipinnit. Eshpish apitashkuannit pishimussa, tshissenimeu tshe pimuteniti Uananuieua. Matshikakuannu uitui, itakanu. Shikush shakatshueuepatashu itakanu, uapateu, ueshama kashkueua itenimeu, pemutenikueni. Pakaieu utamishkuma itakanu ne shikush, tshika ui tshitamueuat nenua amishkua eshkᵘ eka apita-tipishkanit. Kushapatamᵘ itakanu, pitakaieu anite Uananuieu, shipateu nenua. Tepishkat tshitshipitinanu, tshishikashteu miam kashikati eshinakuak. Uananuieu tekushinit, mukᵘ matakapa, mueshkatsheu.

   Natuapameu nenua ka tshitishimikut. Kuekuatsheu tshiputuiemeu nenua, uituinu nenu tshimushu. Ushimisha nenua natuenitamueu tshetshi nanim ituteniti tshetshi aishkat umitshiminiti aishinnua, apu tshika ut punashkamakat assi.

   Tshika ui tshishtaputshikuneueu, tshika nashipeu nete uinipekut tshetshi eka nanautat nipia, tshek ma aishinnuat ui miniti nenu nipinu iu. Katshi tshishtaputshikuneuet, ekue natakashit ekue nipat eshpish nipinnit, ekue apita-nipinnit. Kuessimu,minuat kueshkupanit, shash apitashkuannishapan itakanu ekue unit. Shekashkuaimᵘ ekue naimaniteueu. Uitshinanishapan anite takuakut, Atshena nenua epiniti. Shiuennanu mukᵘ mishanu mitshiminu nete etaniti Atshena, apu ui patshitinak nenu. Nimaniteu au iteu kuekuatsheu nenua Atshenissa. Utinamashu mitshiminu. Atshen tekushinit uitamuakanu katshi utinakannit umitshim, nika nipaiau iu ne Atshen. Kassinu tshekuannu tutamᵘ tshetshi nipaiat nenua ka utinaminiti umitshim. Mashten, Kuekuatsheu niapaieu nenua Atshena.

Kuekuatsheu uieshimeu shishipa, natuenitamueu tshetshi niminiti e pashikuapiniti. Aiashkau nipaieu eshpish niminiti.

Kuekuatsheu mishkamᵘ mitshiminu ekue kutshishtak. Ka-mataushpakunua itenitamᵘ.

Kuekuatsheu uapameu ishkueua etaniti nete akamit. Nishtautukᵘ! Ishi-tepuateu. Apu tapuetuat etikut eshkueuniti.

Innu minuatamᵘ e kushpit, eukuan nenu utinniun. Ben Mckenzie uauitamᵘ tsheku-mitshiminu tshetutakannit kueshpinanunit. Uauitamᵘ ashit tan ka itashiniti auennua mamu e kushpiniti.

Kuekuatsheu natshi-maniteu anite etaniti maikana. Uishamiku tshetshi mupimet mukᵘ itakanu tshetshi akunakuneuiti eshpish tshishauenanunit. Apu natutak etakanit.

Minuenitamupanat innuat nepaiataui mashkua usham mitshetuait aitapatshiakanu mashkᵘ. Peikupipuna piminu kanuenitamupanat, mishta-uikannu kie uiash. Mishta-innishu mashkᵘ itakanu, nishtutamᵘ aimiakaniti mukᵘ takuannu nenu eshi-aimiakanit.