Atanukana mak tipatshimuna

Innu-auass an Aiashess. Kanuenimiku utauia ekue nakatikut minishtikut. Aiashess ekue tshitutet, nanatuapameu uikanisha.

Peikᵘ etashtet: Aiashess nakatiku utauia minishtikut ekue natakamaunikut uteshkan-manitusha.

Nishtina tshe natutakaniti tshetshi nutim petakanit ume atanukan.

Nishtᵘ etashtet : Aiashess nutim tshi shaputueshkamᵘ nenu ka nakashkakut ekue tshi utitat ukauia mak utauia. Eshpish aikamikut utauia, ekue utamuat uteueikana, ekue pashtenit assinu, ishkuatenu. Aiasheu upimim apatenu ekue shakaikanipeianit. Uauitakannu tshekuannu mak aueshishat uinnuht anite uiauat.

Nishᵘ etashtet : Aiashess natuapameu kukuminasha ekue uitamakut tan tshe aitit tshetshi natat uikanisha. Mitshet tshekuannu tshika ui shaputueshkamᵘ eshkᵘ eka utitat uikanisha.

Eukuan an atimᵘ tshitshue kueshapatak itakanu, uin an metshitat aueshisha tshetshi nipaiakaniti umushuma. Anite atanukanit nititatshimushtakuti mani nimushum : maikan ka ui atimut. maikan itiku atimua, shiuenini, eukuan an tshe mut tshimushum ekᵘ nin, ekuan tshe nipian anite nipiti.

Mishta-shashish, apu ut nipik. Mukᵘ tshiam pipunipan. Auass nakatiku uikanisha anite matukapit, usham utikumu itakanu. Katshi tshituteniti ukauia mak utauia, mishta-mau apu tshimuet. Uapameu pietuteniti Atshena, shetshishu. Mukᵘ ma, nenua umushuma uitshiku, natutikumatiku ekue tshiuetaikut. Tekushiniht nete etaniti uikanisha, apu minuatikut nenua ukaumaua, Atshen ekue tshitutet. Eshkᵘ eka tshitutet, ekue itat “akua ma eka tshi tshimueuiekui mati ne nussim”. Nenu tshipa minuatamᵘ tshi pimutakuatat nipin-pineshisha. Ekue tshitutenanut inanu, natshi-nipinenanu. Ui tutuakanu auass tshetshi tshimuet. Mitshetuat auenitshenat tshatuteht netuapamaht nipina. Meshkuakaniht nipinat, tshika mamishkutshipanu nipin inanu. pipun-pishimuat. Kutuasht-tatupishimua tshika nipin kie kutuasht-tatupishimua tshika pipun. Tapue ma auass ekue pimutakuatat pineshisha. Tshek ma anite apu takushinit auass, natuapamakanu, mukᵘ umatshunishima takuanua. Akushiu anite mishtikut pineshish itakanu. Utinikushapan nana pineshisha, uishaushinua mak miam uetakunishkueunishiti eshinakushiti.

Auass nakatiku utauia kie ukauia usham utikumu. Atshena utitiku, natutikumatiku ekue tshiuetaikut nete etaniti uikanisha. Tekushiniht nete etaniti uikanisha, apu minuenitakannit pieshikut Atshena. Kau ekue tshituteniti. Uitamakuat Atshena tshe ui tshimueuiaht auassa, usham tshika mishta-manua. Tapue ma, mishta-mau auass eka uiapamat umushuma. Kassinu tutuakanu tshetshi tshimuet. Ui pimutakuateu nipin-pineshisha. Ueshkat anite assi muku pipunupan. Natshi-nipinenanu, mitshetuteuat aueshishat. Mitshet tshekuannu natshishkamuat, mitshet auennua tepaueuat. Tshek ma ekue mishkuakaniht nipinat, ekue tshi pimutakuatat auass. Eshpish nenu tutak apu uapamakanit nana, miam pineshish ishinakushu itakanu. Ne eshpanit, eukuan uet tshi tshissenimakaniht tshe itashiht pishimuat, tshe pipuk kie tshe nipik.

Ben Mckenzie uitamᵘ auen ne Kuekuatsheu mak tshekuannu uet eka tat anutshish.

Peikᵘ innu ishinikatakanipan Kaianuet, natuapameu nenua ka matshi-tutuakaniti innua.  Memintaieu nanitam, itakanu, nipaiepan auennua. Eukuannua nenua Kaianuet netuapamat. Mitshet tshekuannu tutamᵘ tshetshi katshitinat, tshetshi tshishkueiat.  Papeikᵘ tshi tutueu, kassinu nenua ka matshikaushiniti tshi nipaieu.

Anite atanukanit uauinakanu Kuekuatsheu ka aitit ueshkat nutshimit. Ishpanipan ume anitshenat ishkueua ka peikussiht, tipan ka taht nutshimit. Ishkueuat natauishapanat kie uinuau, umenu tepatshimakanit ne Kuekuatsheu. Ishkueua piminuenua, atikua ui ashamakanu mukᵘ apu minuatak nenu tshekuannu ua ashamakanit, nenu ushtikuannu, eukuannu ua mitshit. Kuekuatsheu mishkueu ishkueua tshe uitshimat kie kutaka ishkueua tshe uitshimakaniti ushtesha kie ushima. Uauitakanu anite shashish ka ishinniunanut. Tan ka aitutuakanit kuekuatsheu.

Kuekuatsheu ashimiku uiashinu maikana. Anite ashtakannu uiashinu utapanashkut mukᵘ itakanu tshetshi eka tshitapatak. Miam nakana ka aitit, apu natutak etakanit.

   Mamauatshieshu ushimisha itakanu Kuekuatsheu, kassinu nenua aueshisha. Tshissenimeu tshe pimuteniti Uananuieua eshpish nipinnit. Eshpish apitashkuannit pishimussa, tshissenimeu tshe pimuteniti Uananuieua. Matshikakuannu uitui, itakanu. Shikush shakatshueuepatashu itakanu, uapateu, ueshama kashkueua itenimeu, pemutenikueni. Pakaieu utamishkuma itakanu ne shikush, tshika ui tshitamueuat nenua amishkua eshkᵘ eka apita-tipishkanit. Kushapatamᵘ itakanu, pitakaieu anite Uananuieu, shipateu nenua. Tepishkat tshitshipitinanu, tshishikashteu miam kashikati eshinakuak. Uananuieu tekushinit, mukᵘ matakapa, mueshkatsheu.

   Natuapameu nenua ka tshitishimikut. Kuekuatsheu tshiputuiemeu nenua, uituinu nenu tshimushu. Ushimisha nenua natuenitamueu tshetshi nanim ituteniti tshetshi aishkat umitshiminiti aishinnua, apu tshika ut punashkamakat assi.

   Tshika ui tshishtaputshikuneueu, tshika nashipeu nete uinipekut tshetshi eka nanautat nipia, tshek ma aishinnuat ui miniti nenu nipinu iu. Katshi tshishtaputshikuneuet, ekue natakashit ekue nipat eshpish nipinnit, ekue apita-nipinnit. Kuessimu,minuat kueshkupanit, shash apitashkuannishapan itakanu ekue unit. Shekashkuaimᵘ ekue naimaniteueu. Uitshinanishapan anite takuakut, Atshena nenua epiniti. Shiuennanu mukᵘ mishanu mitshiminu nete etaniti Atshena, apu ui patshitinak nenu. Nimaniteu au iteu kuekuatsheu nenua Atshenissa. Utinamashu mitshiminu. Atshen tekushinit uitamuakanu katshi utinakannit umitshim, nika nipaiau iu ne Atshen. Kassinu tshekuannu tutamᵘ tshetshi nipaiat nenua ka utinaminiti umitshim. Mashten, Kuekuatsheu niapaieu nenua Atshena.

Kuekuatsheu uieshimeu mashkua. Ishi-katshinassimeu, tshipa tshi tutueu tshetshi niapiniti/napiniti e apashtat uishatshimina.

Kuekuatsheu uieshimeu shishipa, natuenitamueu tshetshi niminiti e pashikuapiniti. Aiashkau nipaieu eshpish niminiti.

Kuekuatsheu mishkamᵘ mitshiminu ekue kutshishtak. Ka-mataushpakunua itenitamᵘ.

Kuekuatsheu uapameu ishkueua etaniti nete akamit. Nishtautukᵘ! Ishi-tepuateu. Apu tapuetuat etikut eshkueuniti.

Shiuenu Kuekuatsheu. Nanatuapatamᵘ tan tshe ishi-uieshimat aueshisha tshetshi mitshishut. «Nipetan nipin» iteu aueshisha tanite ueshkat inanu, nanitam pipunishapan.

Kuekuatsheu natshi-maniteu anite etaniti maikana. Uishamiku tshetshi mupimet mukᵘ itakanu tshetshi akunakuneuiti eshpish tshishauenanunit. Apu natutak etakanit.

Kaianuet ui nipaieu nenua Meminitaieua, atshena ka nipaianiti innua nete nutshimit. Peikᵘ etashtet: Kaianuet kushpu ashit utishkuema mak utshishennima. Ui natshi-nipaieu Meminitaieua. Ekue tshitutet nete shakaikana, amishkua natuapameu ekute netuapamikut Meminitaieua.

Kaianuet ui nipaieu nenua Meminitaieua, atshena ka nipaianiti innua nete nutshimit. Nishᵘ etashtet: Kaianuet uieshimeu Meminitaieua mak ukussinua ekue tshi nipaiat.

Anite atanukanit uauinakanu Memintaieu. Ka mishta-matshikaushit, ka matshi-mitshishut kie ka nipat auennua. Kutak tau, ne Kashess utikutama, tshika natuapameu uin Memitaieua, tshe ui nipaiat. Mishta-pikutau tshe aitutuat nenua. Esseuat itakanu. Ekue tshiuet, miam shiakatshiti aitikashu, usht nenu itu, itakanu. Memintaieu itenitamᵘ tshetshi tshi tutuat nenua, mukᵘ apu tshi tutuat, pikutanua. Kassinu etashiniti tshika tshi nipaieu Memitaieua kie utshinuemakannua.

Utshimau Bellefleur uauineu nenua peikᵘ innua : Netupanu. Tshetshi kanapua uitamuat nenua auassa tshetshi nakatuapamakanniti nenua Netupanua, tshekᵘ ma nete aishkat natshishkuanitaui nenua innua. Nakatuapatamᵘ nenu assinu kie innua itakanu, iteu. Nete nutshimit an mukᵘ uiapamakanit, shakuanniti eukuannu pemutet. Apu kushtikushit itakanu. Shakuanniti apu ut tshi nakatakanit auass nete nutshimit, tshetshi eka peikussit. Tshipa tshi utiniku nenua Netupanua. Kassinu tshekuannu kanuenitamᵘ itakanu, aiamiau ashit. Innu-aimun, tshipa tshi mishtikushiu-aimu anutshish. Utauia kie utauinua tipatshimunipani tipatshimunnu aianishkat anite.  Shash nishuash-tatumitashumitannuepipuna utat.

Kuekuatsheu pimipitshu, ui nashipeu. Eshinakushiniti mishtikua tshitapameu tshetshi mishkak umeshkanam nuash uinipekut.

Innuat nenu tutamuat atanukana tshe tipatshimushtuaht utauassimuaua tepishkaniti pepunniti. Uauitamᵘ Ben Mckenzie tshekuannu nenu uet tutuakaniht auassat.

Atanutshenanu, tipatshimakanu ka inniut Tshakapesh, tanite uetshipanit. Katshituashkua (Matshi-katshitushkuan) nipaienishapani nenua utauia kie ukauia. Katshi naipamat ukauinua kie utauinua, ekue uepimitak nete upime ushpaiua. Ekute anite pietakushit Tshakapesh, ka mataka. Umisha kanuenimiku mak mishta-tshinipinitautshu. Mishta-minuatamᵘ e metuet ashit atshapia kie akashkua, ui natshi-niapaieu nenua ka nipakaniti uikanisha. Katshi katshitinat ekue nutenat, ekute anite meshkamuat upishkueunua ukauia. Aishkat ekue uapatak meshkananu, pishimua umeshkanaminu. Eukuannua nenua tshe ui katshitinat tipishkau-pishimua. Katshi katshitinat, ekute enukushit pishimut, umisha ashit uitapamiku.

Tshakapesh nete tipishkau-pishimut anutshish tau itakanu, ueshkat natamik^u anite assit tapan kie natauipan. Tanua umisha, itiku nenua, tshetshi eka auennua aimiat, tshetshi eka auennua nutshikuat, muk^u apu natutak. Mitshet auennua tepaueu. Aishkat ekue natuapamat Katshituashkua, uapashkua nenua ka nipaiakanniti utauia kie ukauia. Katshi tshishtat utatusseun, ekue nakuet itakanu. Tshek ma ekue tipishkat. Pishimua tapikuateu Tshika kashikau kie tshika tipishkau ek^u iu itakanu. Ekue itutet nete pishimut tshetshi nanitam nakatuapamat innua.  Umisha nete tshishikan-pishimut tshika tanua.