Atanukana mak tipatshimuna

Atanutshenanu, tipatshimakanu ka inniut Tshakapesh, tanite uetshipanit. Katshituashkua (Matshi-katshitushkuan) nipaienishapani nenua utauia kie ukauia. Katshi naipamat ukauinua kie utauinua, ekue uepimitak nete upime ushpaiua. Ekute anite pietakushit Tshakapesh, ka mataka. Umisha kanuenimiku mak mishta-tshinipinitautshu. Mishta-minuatamᵘ e metuet ashit atshapia kie akashkua, ui natshi-niapaieu nenua ka nipakaniti uikanisha. Katshi katshitinat ekue nutenat, ekute anite meshkamuat upishkueunua ukauia. Aishkat ekue uapatak meshkananu, pishimua umeshkanaminu. Eukuannua nenua tshe ui katshitinat tipishkau-pishimua. Katshi katshitinat, ekute enukushit pishimut, umisha ashit uitapamiku.

Utshimau Bellefleur uauineu nenua peikᵘ innua : Netupanu. Tshetshi kanapua uitamuat nenua auassa tshetshi nakatuapamakanniti nenua Netupanua, tshekᵘ ma nete aishkat natshishkuanitaui nenua innua. Nakatuapatamᵘ nenu assinu kie innua itakanu, iteu. Nete nutshimit an mukᵘ uiapamakanit, shakuanniti eukuannu pemutet. Apu kushtikushit itakanu. Shakuanniti apu ut tshi nakatakanit auass nete nutshimit, tshetshi eka peikussit. Tshipa tshi utiniku nenua Netupanua. Kassinu tshekuannu kanuenitamᵘ itakanu, aiamiau ashit. Innu-aimun, tshipa tshi mishtikushiu-aimu anutshish. Utauia kie utauinua tipatshimunipani tipatshimunnu aianishkat anite.  Shash nishuash-tatumitashumitannuepipuna utat.

Ute uauitakanu tan ka aitatussenanut napaiamiananuti ueshkat. Uipat aieshkupinanuipan neme tshe nipaiamiananuti. Shash anite tshissenimakanipan tanite tshe utinakanit ne tshishtapakun tshe tshimikauakanit. Tekuatshiniti, shash mani mamushatshinakanipani minisha tshetshi tutuakaniht tepateuat. Mitshet tshekuan piminuenanuipan, mitshet tshekuan ashtakanipan teshipitakanit: amishkᵘ, atikᵘ, uapush mak pineuat. Mita tutakanipani, kassinu anite naikakanu uashka. Uikutinakanua matshunisha ka mishta-minuashiti, mishta-minuashpititishunanu. Minuenitakuanuipan e tataui uikanishimauat anite patshuianitshuapit.

Utshimau William Mathieu Mark uauitamᵘ etenitak atanukana, tshekuannu ma uet atanutshenanunit mak nenua uet mishta-apatenitakuanniti. Kassinu anite innuat etaht ute tshitassinat atanutsheuat kie uinuau, tapishkut nenua ishinakuanua utatanukanuaua, aitshit aitueuat, ishi-tipatshimuat. Kie uinuau atanukueuat nenua Tshakapesha, Aiashessa kanuenimeuat kie nenua eishinikateuati Mishtapush.  Neni atanukana takuanupani, tshetshi tshishkutamakut nenua auass, tshetshi tshishkutamatishut kie tshetshi nishtutak eishinniunanunit.

Shiuenu Kuekuatsheu. Nanatuapatamᵘ tan tshe ishi-uieshimat aueshisha tshetshi mitshishut. «Nipetan nipin» iteu aueshisha tanite ueshkat inanu, nanitam pipunishapan.

Miam Nipaiamianan, mishta-apatanupan iapit ne kanishtuminashtakan.  Mishta-atussenanuipan, aieshkupinanuipan.  Ekute, katshi aiamianuti, ekue matapenanipan, tshitshipitinanipan.  Utshimashkueu Jourdain tipatshimu ka aitinanunit nete nutshimit, meshta-apatannit nenu e aitinanunit nenu e nishtiniti minashtakana, nikamunanu, mitshishunanu ekue nashipenanut.

Tipatshimunanu ka ishinakuak ne innu-assi, Uashau, eshkᵘ eka takuak ne utenau Sept-îles.  Utshimashkueu Clara Jourdain tipatshimu ka aishpannit nete ueshkat. Mitshetipanat anite innuat etaht anite Uashat, manukatishupanat. Peikᵘ anite iu, takuaikan ishinikateu nenua ka takushiniti, nete uetuteniti tshishe-utshimat, natshi-uitamakuat tshe atanakaniht nete Mani-utenam. Utshimashkueu Jourdain, tshissitutamᵘ ka aishpannit, ka tipatshimushtakut nana umushuma kie uin ka ishi-uapatak, eukuan ishinakuanupan iu utshimashkueu Clara Jourdain.

Utshismashkueu Jourdain tipatshimu ueshkat ka shiueniht uin, unapema kie utauassimuaua. Ushikushinua unapema, animunua. Apu tshekuannu nipataht. Ekue tshek nenua unapema ekue tshiueniti, nashipenua. Tshitapameu unapema tshiaueniti mak nenua utauassima apu shapishiniti, minieu mani nipinu. Tshek ma ekue nipaiat pineua ekue tshi apishish ashamat auassa tshetshi eka akushiniti. Ashuapameu unapema, nipitshe nana itenimeu. Ui tshiueu kie uin nete innu-assit. Miam tshipa tshituteuat ekue petahk tshekuannu. Tshekuannitshe!

Mishta-shashish, apu ut nipik. Mukᵘ tshiam pipunipan. Auass nakatiku uikanisha anite matukapit, usham utikumu itakanu. Katshi tshituteniti ukauia mak utauia, mishta-mau apu tshimuet. Uapameu pietuteniti Atshena, shetshishu. Mukᵘ ma, nenua umushuma uitshiku, natutikumatiku ekue tshiuetaikut. Tekushiniht nete etaniti uikanisha, apu minuatikut nenua ukaumaua, Atshen ekue tshitutet. Eshkᵘ eka tshitutet, ekue itat “akua ma eka tshi tshimueuiekui mati ne nussim”. Nenu tshipa minuatamᵘ tshi pimutakuatat nipin-pineshisha. Ekue tshitutenanut inanu, natshi-nipinenanu. Ui tutuakanu auass tshetshi tshimuet. Mitshetuat auenitshenat tshatuteht netuapamaht nipina. Meshkuakaniht nipinat, tshika mamishkutshipanu nipin inanu. pipun-pishimuat. Kutuasht-tatupishimua tshika nipin kie kutuasht-tatupishimua tshika pipun. Tapue ma auass ekue pimutakuatat pineshisha. Tshek ma anite apu takushinit auass, natuapamakanu, mukᵘ umatshunishima takuanua. Akushiu anite mishtikut pineshish itakanu. Utinikushapan nana pineshisha, uishaushinua mak miam uetakunishkueunishiti eshinakushiti.

Jos Dominique uauitamᵘ ka itenitakuannit anite innu-assit Uashat ueshkat. Apu ut tshi pitutsheht anite innu-assit anitshenat kakusseshiht, mukᵘ passe tshi pitutshepanat.

Marie-Louise André tipatshimu. Shash mitshetupipuna eshpish uniat unapema, uin e peikussit nitautshinepan utauassima. Schefferville utshiu kie ekute eshkᵘ epit.

Uauitamᵘ Marie-Louise ka ishpish mishta-nipatatsheht innuat ueshkat. Tshi manukashuipanat innuat ashit unipatatsheunuaua.

Ishkueuat ka ishinakuannit ueshkat utatusseunnuau Eshuapamaushuti ishkueu, tshika ui nashatsheu mukᵘ e aitinanunit nete kueshpinanuniti. Nakauinanuipan tshetshi uapamat utauassima shash ekue tshatshipitinanuti ekue tshitutet kie uin. Ute, tipatshimakanu ka inniut Marcel Jourdain. Miam nenu shiuenanuipan. Apishish tshika ui mitshishu ne ukaumau tshetshi tshi ashamat nenua utauassima. Eukuan ishinakuannipan ueshkat nutshimit.

Teuiekan minu-apatshiakanipan kie mishta-ishpitenimakanipan. Uitshiuepan tshetshi tshissenitakannit anite etaht atikuat.

Uauitakanu tan eshi-naushunakanit ne auen tshe kapitenut mak tshekuannu tshe tutak nemenu kushpinanuniti.

Nishᵘ aussat nanitam mamu tapanat itakanuat, natauipanat mamu tekuatshiniti. Peikᵘ ne auass matenitamᵘ tshekuannu itakanu, matenitamᵘ anite uiat, miam e shetshishinanuti. Tekuatshinnit, ituteuat nete etaniti uishtaua. Tekushiniht nete, tipatshimushtueu umisha, apu tapuetuakanit nenu etatshimut. Tshika mishta-mitshetuat auenitshenat tshe takushiniht iu. Matshinnuat anitshenat, takushinnuat, mashikueuat nenua innua. Tshitishimuat auassat nete nipit ekue akushiht minaikut tshetshi eka uapatakannit anite ka pimuteht. Atimua kanuenimeshapanat matshinnuat, nipaimeuat nenua Ekue tshiueht, ekue tipatshimuht ka ishi-uapatahk nutshimiht. Mitshet innuat nana nipakanuat itatshimuat.

Nishtinnipani innuat ka utamuaht teueikana iapatenitahk. Mishta-akua tutamupanat nenua e nishtinniti.

Innuat nenu tutamuat atanukana tshe tipatshimushtuaht utauassimuaua tepishkaniti pepunniti. Uauitamᵘ Ben Mckenzie tshekuannu nenu uet tutuakaniht auassat.

Ueshkat, apu ut minakaniht tshetshi taht auassat anite pessish menuinniuti ishkueua nutshimit. Tshitishauakanipanat tshe ishpish minuinniuniti nenua ishkueua. Ben Mckenzie tipatshimu ka tshitishauakaniht peikuau euassiut.

Ben Mckenzie uitamᵘ auen ne Kuekuatsheu mak tshekuannu uet eka tat anutshish.

Ka ishinakuannit utinniun mak utatusseun ishkueu nutshimit e ashuapamaushuti. Menuinniuti tepishkanit, shaputue ekue unit uiapannit ekue pimutet kie uin. Apu ut minekash nakauikanut ishkueu menuinniuti.

Innu minuatamᵘ e kushpit, eukuan nenu utinniun. Ben Mckenzie uauitamᵘ tsheku-mitshiminu tshetutakannit kueshpinanunit. Uauitamᵘ ashit tan ka itashiniti auennua mamu e kushpiniti.

Ben Mckenzie uauitamᵘ eshinikateniti pakatakana tekuanniti Mishta-shipit, nete itetshe Labrador City. Uineu ashit eshi-taniti namesha nete shipia mak shakaikana.

Tipatshimu Ben Mckenzie ka tshitutet ut Schefferville nuash nete Fort-Chimo ashit utauia. Uauitamᵘ eshinikateniti passe anite ka itutet e innunikateniti mak e mishtikushiunikateniti.

Neme pipun 1945, peikushteu innuat neshtuapaueshapanat nete Ashuanipit. Eukuan nenu tepatshimut Ben Mckenzie.