Atanukana mak tipatshimuna

Namaienua innua nenua utauia Mani. Nete Uapamekushtikut utshinua. Takushinnishapani ashit ushteshinua ekue taniti anite uinipekut ekue nipauniti.

Tipatshimu Mitushapeu ka utatshimikut ukauia eka menuinniunniti. Mishta-ushkuinipani ukauia peikuan kie mishta-atussenipani. Kassinu anitshenat ishkueuat mishta-atussepanat at shukᵘ eka menuinniutaui. Apu ne ishinakuak anutshish iu.

Nutshimit etananuti, minu-uitamuakanipan tshekuannu ueshkat ishkueu, mishta-apatishu etati. Kassinu aitatussenanuipan nete nutshimit : e kussikuashunanut, e maushunanut, e massinitshenanut. Kassinu tshekuan apatanipan, mate massinitshenanipan kie ne apatanipan utashtishimeukᵘ, pashakanipan, eukuan an usheshtakuiapimikashunanipan.

Ka ishinakuannit utinniun mak utatusseun ishkueu nutshimit e ashuapamaushuti. Menuinniuti tepishkanit, shaputue ekue unit uiapannit ekue pimutet kie uin. Apu ut minekash nakauikanut ishkueu menuinniuti.

Ishkueuat ka ishinakuannit ueshkat utatusseunnuau Eshuapamaushuti ishkueu, tshika ui nashatsheu mukᵘ e aitinanunit nete kueshpinanuniti. Nakauinanuipan tshetshi uapamat utauassima shash ekue tshatshipitinanuti ekue tshitutet kie uin. Ute, tipatshimakanu ka inniut Marcel Jourdain. Miam nenu shiuenanuipan. Apishish tshika ui mitshishu ne ukaumau tshetshi tshi ashamat nenua utauassima. Eukuan ishinakuannipan ueshkat nutshimit.

Mani tipatshimu ka uitimushit nenua ushkat napeua ka uitshimat. Iapit apu ut tapuetaminiti ukauia tshetshi uitshimat nenua, mukᵘ apu pishishtuat ekue uitshimat.

Tipatshimakanu kukuminash ka nipaikut utauassima pessish anite peikᵘ shipissinu, eukuan eshinikatenit nenu shipissinu miam ka ishinikashut. Uauitakanu ashit tshekuan ma eshinikatet ne pakatakan/kapatakan Kakatshat.

Tipatshimeu Ben Mckenzie ataunnua ka utitakuniti katshimaitsheshua peikuau tepishkanit mekuat meshta-tshishkueienitakuannit. Tauat anite minashkuat itakanuat ashit innua kie natauat miam innuat.

Anite atanukanit uauinakanu Kuekuatsheu ka aitit ueshkat nutshimit. Ishpanipan ume anitshenat ishkueua ka peikussiht, tipan ka taht nutshimit. Ishkueuat natauishapanat kie uinuau, umenu tepatshimakanit ne Kuekuatsheu. Ishkueua piminuenua, atikua ui ashamakanu mukᵘ apu minuatak nenu tshekuannu ua ashamakanit, nenu ushtikuannu, eukuannu ua mitshit. Kuekuatsheu mishkueu ishkueua tshe uitshimat kie kutaka ishkueua tshe uitshimakaniti ushtesha kie ushima. Uauitakanu anite shashish ka ishinniunanut. Tan ka aitutuakanit kuekuatsheu.

Kuekuatsheu uapameu ishkueua etaniti nete akamit. Nishtautukᵘ! Ishi-tepuateu. Apu tapuetuat etikut eshkueuniti.

Metapenanuti, mishtshet auassat inniuishapanat. Ueshkat auassat itakanipanat, anite pashkutshitakut mishkuakanipan ne auass. Katshi inniutaui auassat, uinakanuat tshe ishinikashuht eshkᵘ eka shukaitashuht. Shash ekue aieshkupinanut tshetshi tshiuenanut.

Tipatshimeu utshimashkueu Mckenzie ka akushiniti mak eka ka inniuniti umisha. Kauishakapekashinit itakushinishapani. Uauitamᵘ ashit tan ka aitinanunit eshkᵘ eka nipepinanunit mak tan ka ishi-kanuenitakanit ne nikuashkan. Minekash apu tshi nashipetatakanit, patush uinashku-pishimua tshi nashipetatakanu piapanit upashtamakan.

Katshi matapenannit eukuannu enniut Shimun. Nenua Pinamena uiapamikut kie eukuannua uianikut tshe ishinikashut. Ueshkat ishkueu pimutepan nuash tshe ishpish minuinniut.

Marie-Louise André tipatshimu. Shash mitshetupipuna eshpish uniat unapema, uin e peikussit nitautshinepan utauassima. Schefferville utshiu kie ekute eshkᵘ epit.

Kassinu tshekuannu nipa nakatamuauat auassat, apu tshekuan minatshitaian. Apu nita tshishkutamakauian nin, mukᵘ nukum an ka tshishkutamut. Nipa minueniten tshetshi auassat kanuenitahk ka aitiniti ukumuau kie umushumuau. Ueshkat auassat, kassinu tshishkutamuakanipan tshekuannu kie ishkueu miam napeu itenitakushipan. Ishkuessat ashit tshipa tshishkutamuakanuat tshetshi assimeht, pitshikuenitsheht, tshetshi nakatuenimaht utauassimuaua. Anite innu-assit eshpish taht auassat uet ait itenitakushiht, ait ishinniunanu.

Mani tipatshimeu ushkat uitimusha. Apu ut tapuetaminiti ukauia tshetshi uitshimat nenua.