Atanukana mak tipatshimuna

Mishta-shashish, apu ut nipik. Mukᵘ tshiam pipunipan. Auass nakatiku uikanisha anite matukapit, usham utikumu itakanu. Katshi tshituteniti ukauia mak utauia, mishta-mau apu tshimuet. Uapameu pietuteniti Atshena, shetshishu. Mukᵘ ma, nenua umushuma uitshiku, natutikumatiku ekue tshiuetaikut. Tekushiniht nete etaniti uikanisha, apu minuatikut nenua ukaumaua, Atshen ekue tshitutet. Eshkᵘ eka tshitutet, ekue itat “akua ma eka tshi tshimueuiekui mati ne nussim”. Nenu tshipa minuatamᵘ tshi pimutakuatat nipin-pineshisha. Ekue tshitutenanut inanu, natshi-nipinenanu. Ui tutuakanu auass tshetshi tshimuet. Mitshetuat auenitshenat tshatuteht netuapamaht nipina. Meshkuakaniht nipinat, tshika mamishkutshipanu nipin inanu. pipun-pishimuat. Kutuasht-tatupishimua tshika nipin kie kutuasht-tatupishimua tshika pipun. Tapue ma auass ekue pimutakuatat pineshisha. Tshek ma anite apu takushinit auass, natuapamakanu, mukᵘ umatshunishima takuanua. Akushiu anite mishtikut pineshish itakanu. Utinikushapan nana pineshisha, uishaushinua mak miam uetakunishkueunishiti eshinakushiti.

Enen inniuipan nete nutshimit Nutashkuanit, nemenu 5 uashtessiu-pishimua 1931. Uitshimepan, Shenuma (Shenum Muanan) pipunnu 1948 mak peikunnu ashu kutuasht itashinipani utauassimuaua, peikunnu napessa mak kutuasht ishkuessa. Kutuasht-tatunnuepipuna ashu nishᵘ ishpish nipauipanat. Neunnu ashu peikᵘ itashinua ussima kie nishuaush-tatunnu utanishkutapana. Anutshish, uin an anu uet tshishenniut anite Ekuanitshit. Mishta-minuinniu kie eshkᵘ mishta-minu-aiatshiu kie mishta-ashitshiu anite innu-assit. Kussikuashu, massinitsheu mak atanutsheu.

Miam nakana ka aitiht innuat eshkᵘ eka tshitshipaniht etusseht, Enen aiamiau. Pakushenitamᵘ tshetshi minupannit tshe aitatussenanunit umenu kashikanit.

Ekute innuat mamuitupanat tshetshi aiamiaht peikuau peikupipuna, nipauiakanipanat, shukaitaushunanuipan kie tumishkatukuenanuipanat. Ekute anite nepiniti umishuminua unapema ne Enen. Uitshiaushinishapani nenu napeua tshematakannit aiamieutshuapinu, miam anite Ekuanitshit ka ishinakuannua. Ekute ut mani kushpipanat anitshenat innuat katshi aitatussenanuti. Kassinu auenitshenat aieshkushtauat umatshunishimuau Tshekat nete shash tekuatshiniti, ekue kushpiht.

Katshi tshishi-aitinanuti neme napik, katshi nipaunanuti, mitshetukapauat napauht nete Mashkuanut. Ekue kushpinanut. Peikᵘ ne ishkueu akushu apu ekue nipit. Mekuat e aitutakanit nikuashkan, nipakanu atikᵘ, nutim eshpishtit aitutuakanu, naikuakanu ekue tshissuakanit. Kassinu auen mitshishu kie ashit auassat. Katshi tshishi-aitinanut, ekue tshiuenanut nete ka nakataikaniti tshekuana. Eukuan itipanat ueshkat innuat.

Metapenanuti, mishtshet auassat inniuishapanat. Ueshkat auassat itakanipanat, anite pashkutshitakut mishkuakanipan ne auass. Katshi inniutaui auassat, uinakanuat tshe ishinikashuht eshkᵘ eka shukaitashuht. Shash ekue aieshkupinanut tshetshi tshiuenanut.

Mishta-nitau-atussepanat mani auassat. Mitshet tshekuannu tshishkutamuakanipanat kie tutamupanat, e uitshiaht nenua tshishennua. Manashteuat, uapekaitsheuat, assimataitsheuat kie massinitsheuat. Kassinu tshekuannu ishi-katshiuipanat kie mitshetuait ishi-tshishkutamuakanipanat.

Nanitam nutshimit nipaiamiananipan ueshkat. Mishta-aiamiananipan. Mitshishunanuipan katshi tshishi-aiamiananuti.

Shashish innuat takuannikupan eshi-aimiaht. Atut shukaituakanuat miam anutshish. Ekᵘ ne e uauitakanit kushapatshikan, mishta-shutshishimakanukupan, ua natu-tshissenitakaniti tshekuan itapashtakanipan, tshishennuat nenu mukᵘ apashtapanat.

Tapanat anitshenat Memekueshuat nete nutshimit kie anitshenat Uapanatsheuat. Matenimakanipanat nete ueshkat etananuti nutshimit. Ui kushtatshiepanat innua itakanuat. Mishtikushuat anat itakanipanat, ka tshitishimuht miam nenu ka mishta-natupananunit. Miam anitshenat nishᵘ Nekuanashissat nete Nemishkat ka mishkuakaniht nete nutshimit. Nipishapanat itakanipanat. Mashinaitsheshapanat, uauitamushapanat ka aitiht.

Nin mukᵘ tshiam nitinnu-aimin. Apu tapuetuakau nussimat tshetshi mishtikushiu-aimiht. Nutaui kie nukum mishta-nishtutamupanat kutaka aimuna. Mishtikushiushkueu nana nukum kie innu-aimipan mishtikushua muku mishtikushiu-aimiepan. Tshipa nishtutamuat innu-aimiakaniht nanitam auassat tshetshi eshkᵘ innu-aiminanut.

Tshipa tshishkutamuakanuat auassat innu-aimunnu mak innu-aitunnu tshetshi itatusseht. Miam ne peikᵘ ussinitshishu ka uitshi-atussemeua nenua tshishennua, ka mishta-pikutaua e aitatusset. Tshipa tshishkutamuakanuat tshetshi naikuaht atikua, mishtikuaia. Tshipa tshi tutamuat pishakanessina : atikuiana kie ma atshikuiana tshipa apatshieuat.

Mitshena neni pakatakana nete nutshimit nete kueshpinanuti nete itetshe Nashkuaikanit, nete Unaman-shipit. Kassinu neni pakatakana/kapatakana uitakanua eshinikateti. Anutshish nasht apu ishinakuak neme assi ueshkat ka ishinakuak eshpish tshitshipananut e atussenanut nete Unaman-shipit.

Mitshena natukuna iapashtakaniti ua natukuitishunanuti. Ushakanua kie ma akupitamashunanua. Ne uet tshi nishtuapataman nanitam nuitsheuatiat tshishennuat netuapatakaui minashkuau-natukuna, eukuan uet tshi tshissenitaman etapashtakaniti natukuna, kassinu neni kie tshe aitutakaniti.

Peikuan iapit nishuaush-tatunnu ashu neu tshe itatupipuneshian, miam meshta-auassiuiani etamatshiuan iu Enen.

Kueshpiht anite peikuau katshi nipauht. Nete nutshimit eshpish taht, ekue ushikushiniti umushuma, Shinapesht Muanana, natuakateshinua. Natukuienua unapema mak nenua ukuma. Nashipepitshuat tshetshi itaunaht nete natukunitshuapit. Mishta-minu-aitutamueshapan nenu ka natuakateshiniti ekue tshi kau minu-pimuteniti. Eshpish ma pikutakupanat ueshkat innuat e aititaui.

Kutakanu tipatshimu ka kushpiht ashit unapema kie kutaka innua. Natshi-takuakapuat nete Nashkuaikanit itetshe. Nipaiuat utshashumekua, mashkua, atikua, kakua, uapineua tshetshi mitshishuht. Tapue mitshetuait aitatussenanu etananuti nutshimit : nataunanu, uashuananu. Nete tshe takuakapiht iapit tshika nataunanu.

Mekuat tekuakapinanut, nipaiakanu mashkᵘ ekue tutuakanit mashku-pimi. Kakua ne peikᵘ nipaieu, ekue minuat tshi mitshishuht. Ekute tshe nipaiamiaht. Tepishkanit, aiamiananu, minekash aiamiananu kie nikamunanu. Uapatakanuat mishta-mitshet atikuat, miam meshta-mitshetitaui, mukᵘ shakautikuat anat eshapanat. Mishta-minuatamuat anite etaht utassiuat. Shiakuannit ekue nashipepitshiht.

Katshi matapenannit eukuannu enniut Shimun. Nenua Pinamena uiapamikut kie eukuannua uianikut tshe ishinikashut. Ueshkat ishkueu pimutepan nuash tshe ishpish minuinniut.

Shikuanitakanipan mani ueshkat. Amishkᵘ ashtuakanu. Miam shiship-pishimua tshe nashipepitshinanut. Peikuau itatshimu Enen, nimushekuamunan nete pessish Nashkuaikanit. Tshipa minuatamuat nenu auassat kie uinuau shikuanitaht.

Napaien Muanan, nitishinikatakaun, nishuaush nitatunnuepipuneshin. Ninipauti mak patetat itashipanat nitauassimat kie tauat nussimat. Apu tshissenitaman tanite nipa utshipan: Muanan. Nutaui mak nukumesh Atuaniss mukᵘ nitshissenimauat, nete takupanat Pakut-shipit kie Unaman-shipit, ekute uetuteht. Tanite ututetshe nana nimushum Jos Mullen, nasht apu tshissenimak, nete Tshishe-shatshit kie ma Mishta-minishtikut put. Akaneshau uesh na nimushum. Nutaui Shinipesht ishinikatakanipan. Ekᵘ nana nikaui, Manakanet ekuanitshiushkueu nana uin. Nete Manitu-nipit nitinniuti, apu nashkuat katakᵘ anite Ekuanitshit. Peikunnueshipanat ashu peikᵘ nishteshat kie nishimat.

Nanitam nititatan nutshimit, patush katshi nipauian ekue pessish ute Ekuanitshit taian. Nutaui mak nimushum Mishtikushish kie ne nimushum Tamienish. Ninataunan : amishkua, atikuat. Piakuaiki nipissa, ekue nashipeiat. Nitepauananat nimushuminan Nuna mak Shushep. Nimanukashunan anite ekue mitshishunanut : atikuiash, pashteuiash, mupimenanu ashit. Ekue nashipeiat.

Mishta-atussenannikupan nanitam, mishta-atussepan auen. Ekᵘ anutshish nin, shash tshekat nishuasht-tatupipuna apu tshekuan tshi tutaman, mukᵘ nitapin, mukᵘ nimitshishun mukᵘ tshiam. Ueshkat nete nutshimit etaian, apu ut ishinakuak, nimishta-papamuteti, mishta-katakᵘ nitituteti. Mishta-kashtshi-tipishkapan tshaueiani. Mauat ma auen nita nika ut matenimau tshetshi nutshikut. Peikuau anite nitamishetshipan tanite mishta-kashti-tipishkau, tshissekau anite etuteiat. Nishtesh Mishen an nuitsheuau. Nitshiuenan an. Nasht pessish apu nukuak.

Apu nita pimuteian tshetshi ituteian nete Tshishe-shatshit, muk^u mishta-pessish anite nut tshiuen. Takuanipan anite utatauitshuap Mishta-Napeu, ekute natakanipan mitshim, ekute uet tshiueian. Kassinu neni etamuti pakatan-meshkanaua ute pessish Ekuanitshit kassinu neni nimitimeshken.

Nete nutshimit nut tshishkutamakauitan, anitshenat kanataushiht mak kanapua nimushum Mishtikushish, ekute tshessinuapiat. Tshitutakanipanat napessat kueshpinanuti. Mishta-mishapan atushkan ueshkat eshkᵘ eka kueshpinanuti, tshe tutakaniti mitshet tshekuana: ashamat, utapanashkᵘ mak makanipakan...  Katshi nipauian iu, peikuau anite nushikushin netauian, tshekat nitshipatashkushin mishtikᵘ tanite mishta-kashti-tipishkau anite etuteian, tshaueian, iu. Ushkat atikua nepat e peikussit, peikunnuepipuneshikupan ashu neu kie ma ashu patetat.