Atanukana mak tipatshimuna

Ueshkat innu animiuipan nete nutshimit etati. Apu ishinakuak anutshish, anu uetshiu.

Nanitam tshekuan ashamitunanuipan nepatakaniti kie uauitshitunanuipan miam auen iakushiti. Uipat kushpipanat auenitshenat eka tshekuannu matshitaui innu-assit. Auen nepatatsheti, kassinu auennua tepaueu etashiniti. Nutim tshekuan ashamitunanuipan.

Eshkᵘ eka kushpiht ashuapamituat, passitsheuat tshetshi uitahk etaht anite kie ma tshetshi uitahk tekushiniht.

Nete nutshimit nut tshishkutamakauitan, anitshenat kanataushiht mak kanapua nimushum Mishtikushish, ekute tshessinuapiat. Tshitutakanipanat napessat kueshpinanuti. Mishta-mishapan atushkan ueshkat eshkᵘ eka kueshpinanuti, tshe tutakaniti mitshet tshekuana: ashamat, utapanashkᵘ mak makanipakan...  Katshi nipauian iu, peikuau anite nushikushin netauian, tshekat nitshipatashkushin mishtikᵘ tanite mishta-kashti-tipishkau anite etuteian, tshaueian, iu. Ushkat atikua nepat e peikussit, peikunnuepipuneshikupan ashu neu kie ma ashu patetat.

Uauineu aueshisha ka taniti kie ka itashiniti ueshkat mak ka ishi-uapamat anite pessish uinipekut kie nete nutshimit : mashkua, atikua kie ashit musha. Anitshenat atikuat tapanat anite pessish ekᵘ anutshish apu taht, minashkuau-atikuat mishta-uitshitipanat kie uinnupanat. Uauineu etenitakushiniti atikua kie musha, tan e aitiniti miam uashakuniti. Mishta-tshikamakushu an iteu, uashakuti. Apu animatshenitakushit atikᵘ e tshitutakanit : peshuetamᵘ, kuishkᵘ nateu auennua. Etataui anite napetikᵘ kie ishkuetikuat nasht apu kushtatshit napetikᵘ kie ne iapit nepakaniti ishkuemush apu tshitishimut ne napemush. Mush ashit apu kushtatshit ekuan ekue natat auennua. Masten, ekue tipatshimut ka natauht, musha ka uapamaht kie ka nipaiaht.

Kueshpinanuti, utinakanu peikᵘ innu tshetshi kapitenut. Uin nenu tshika uitamᵘ tan tshe aitinanunit. Utiniku innua usham shutshenimiku kie kassinu natutuakanu.

Nete itetshe Unaman-shipit menu-tshissenitaman iu : pakatakana, shipua kie nipia. Uauitamᵘ eishinikatakannit tanite ka aitutet ueshkat. Mitshet aishinikatakanua neni nipia, shipua kie pakatakana. Nete itetshe etutakaniti anutshish ushkutima, takuan anite nikuashkan, kukuminash an itakanu. Natuenitamupan tshetshi aimituakanit auen kueshpiti. Anutshish tutakanua anite ushkutima. Nishatshuapatenan ne ashit kauashtenimanitshesht. Ekue itak : « Apu ut natuenitak nenu tshetshi nissipanakanit ne kukuminash ». Tshika nashipeshtakanua ushkana nitikᵘ, nuitamuau etenimak, iteu. Ne mashten tshe takuak ushkutim iu, tan nipa tshi nita iteniten tshetshi takuak anite ushkutim, ekute anite nipapimutetan, iu.

Ueshkat, innu mishta-shatshikupan unataun, mukᵘ eshinakuannit tshekuannu iapashtati e nataut tshi nipatatshepan. Mak ashit, innuat nipaiepanat atikua mukᵘ tshe ishpish ishpaniht tshetshi mitshishuht. Minuenitamupanat nepaiataui peikᵘ kie ma nishᵘ atikua, apu anu ut nipaiaht. Anutshish, mishta-nipaiakanu atikᵘ. Apu ishinniunanut miam ueshkat.

Uapatiniueu Mitushapeu mishtikunu ka apashtaniti innua tshetshi uapataminiti katakᵘ. Tshiam an mishtikᵘ, apu auat pakuneiat. Mishta-katakᵘ anite uapamepanat aueshisha innuat nenu iapashtataui. Anutshish, apu apashtakanit, aiauat tushkapatshikana meshta-animanniti.

Mishta-kashekauat kueshpitakanitaui anitshenat auassat tsheshkutamuakanitaui innu-aitunnu. Mishta-natutamuat uatamuakanitaui tshe aitutuaht aueshisha. Tan tshe aitiht natautaui, mishta-akua tshika ui tutakanu. Mishta-akua tutuakanu napeu netauti, umatshunishima tshe ishinakuaniti. Mishta-ait itenitakuan anutshish.

Mani ushtesha nutim aitutuenipani aueshisha nepaianiti ekue tshissimupan uiashinu meshekut anite nepatshet eshkᵘ eka tshiuetatat anite uatshinanunit.

Akua tutuakanipan aueshish katshi nipaiakanit. Mishta-ishpitenimakanipan.

Katshi nipauht ekue kushpiht, katshi nipaianiti atikua unapema napinnit ekue nashipeht. Kau ekue kushpiht tekuatshinnit.

Anite itetshe ut Ekuanitshit ueshkat kueshpinanuti, neme Patamu eukuan nataikanipan. Ne ashukan ka takuanua. Tan tshipa tshi nita tshi itenitamᵘ auen tshetshi pimamut anite meshkanau, tshetshi pimipanit anite utapan. Mitshenipani pakatakana, mishta-pitshaua neni passe kie passe pessua. Autakanua matshunisha, uiushinanu ekue matapeshtakanit. E ma mishta-aieshkushit auen, iapit iakushiti auen, peikuan eukuan eshitshimenanut. Ekᵘ anutshish nasht apu tshi matshit auen e aititi, iakussiti. Ekᵘ ma ueshkat, apu ut ishakuak an.

Kutakanu tipatshimu ka kushpiht ashit unapema kie kutaka innua. Natshi-takuakapuat nete Nashkuaikanit itetshe. Nipaiuat utshashumekua, mashkua, atikua, kakua, uapineua tshetshi mitshishuht. Tapue mitshetuait aitatussenanu etananuti nutshimit : nataunanu, uashuananu. Nete tshe takuakapiht iapit tshika nataunanu.

Minuenitamupanat innuat nepaiataui mashkua usham mitshetuait aitapatshiakanu mashkᵘ. Peikupipuna piminu kanuenitamupanat, mishta-uikannu kie uiash. Mishta-innishu mashkᵘ itakanu, nishtutamᵘ aimiakaniti mukᵘ takuannu nenu eshi-aimiakanit.

Mishta-atussenannikupan nanitam, mishta-atussepan auen. Ekᵘ anutshish nin, shash tshekat nishuasht-tatupipuna apu tshekuan tshi tutaman, mukᵘ nitapin, mukᵘ nimitshishun mukᵘ tshiam. Ueshkat nete nutshimit etaian, apu ut ishinakuak, nimishta-papamuteti, mishta-katakᵘ nitituteti. Mishta-kashtshi-tipishkapan tshaueiani. Mauat ma auen nita nika ut matenimau tshetshi nutshikut. Peikuau anite nitamishetshipan tanite mishta-kashti-tipishkau, tshissekau anite etuteiat. Nishtesh Mishen an nuitsheuau. Nitshiuenan an. Nasht pessish apu nukuak.

Mishta-nitau-nataunipani Mani ushtesha, Napessisha. Mitshet eshinakushiniti aueshisha mak namesha nipaienipani. Nenu kutakanu tshekuannu miam nushkuaua, takuannipan tshetshi natahk nete katakᵘ niutepanitaui.

Nanitam kushpipanat eshakumitakuatshiniti ekue nashipeht patush napinniti, uapikun-pishimua.

Nanitam nititatan nutshimit, patush katshi nipauian ekue pessish ute Ekuanitshit taian. Nutaui mak nimushum Mishtikushish kie ne nimushum Tamienish. Ninataunan : amishkua, atikuat. Piakuaiki nipissa, ekue nashipeiat. Nitepauananat nimushuminan Nuna mak Shushep. Nimanukashunan anite ekue mitshishunanut : atikuiash, pashteuiash, mupimenanu ashit. Ekue nashipeiat.

Metapenanuti, mishtshet auassat inniuishapanat. Ueshkat auassat itakanipanat, anite pashkutshitakut mishkuakanipan ne auass. Katshi inniutaui auassat, uinakanuat tshe ishinikashuht eshkᵘ eka shukaitashuht. Shash ekue aieshkupinanut tshetshi tshiuenanut.

Uauitamᵘ Ben Mckenzie eshi-taniti innua nete nutshimit mak eshinikateti pakatakana. Ashuanipiu-pakatakanit ut nuash anite itetshe Kauauatshikamat. Nete minaikut nuash ushkuassit tanishapani uikanisha uin.

Uauitamᵘ Mani ka uitshiat utauia e nipaianiti amishkua pepunnit.

Nishiuenitan nete peikuau. Nukum Nenikutesh ishinikatakanipan nuitshimatan. Nishiuenitan, nishiuenan apu tshekuan takuak tshe mitshinanut. Mitshetipanat auassat anite etaht anutshish shash nananat apu taht. Tshek ma anite ekue nipaiakaniht atikuat, peikumitashumitannu atikuat. Metat ekue mishta-ishpannanut mitshim, nishuasht nitatukamitshishunan. Ekue nashipepuniat. Nimishta-minuateti etaiani nutshimit, kassinu ne ka aitiat ueshkat.

Pepuk peikuau, ninashipepitshitan, apishissishipan nishim Pinamen. Nanitam kusseu Napessish. Eshakumitakussiniti peshueu namesha tshetshi mitshishuniti ushima. Manaikannu upimim ne namesh tshetshi ashamakanit ne nishim Pinamen. Nuash eshpish matapenanunit takuannu umitshim ne nishim.