Atanukana mak tipatshimuna

Nishtᵘ etashtet : Aiashess nutim tshi shaputueshkamᵘ nenu ka nakashkakut ekue tshi utitat ukauia mak utauia. Eshpish aikamikut utauia, ekue utamuat uteueikana, ekue pashtenit assinu, ishkuatenu. Aiasheu upimim apatenu ekue shakaikanipeianit. Uauitakannu tshekuannu mak aueshishat uinnuht anite uiauat.

Nishᵘ etashtet : Aiashess natuapameu kukuminasha ekue uitamakut tan tshe aitit tshetshi natat uikanisha. Mitshet tshekuannu tshika ui shaputueshkamᵘ eshkᵘ eka utitat uikanisha.

Mani mineu aimunnu auassa mak katshishkutamatsheshiniti innu-aitunnu uiauitakannit.

Nin mukᵘ tshiam nitinnu-aimin. Apu tapuetuakau nussimat tshetshi mishtikushiu-aimiht. Nutaui kie nukum mishta-nishtutamupanat kutaka aimuna. Mishtikushiushkueu nana nukum kie innu-aimipan mishtikushua muku mishtikushiu-aimiepan. Tshipa nishtutamuat innu-aimiakaniht nanitam auassat tshetshi eshkᵘ innu-aiminanut.

Tipatshimu Ben Mckenzie tan ka itenitakuannit etananunit ishkanipipuna uinipekut, eka kueshpinanuti.

Mishta-nitau-atussepanat mani auassat. Mitshet tshekuannu tshishkutamuakanipanat kie tutamupanat, e uitshiaht nenua tshishennua. Manashteuat, uapekaitsheuat, assimataitsheuat kie massinitsheuat. Kassinu tshekuannu ishi-katshiuipanat kie mitshetuait ishi-tshishkutamuakanipanat.

Mishta-kashekauat napessat kueshpitakanitaui, mishta-minuatamuat nutshimit etataui. Mukᵘ anite pessish shash tshipa mishta-minumatshiuat nenu. Tshipa ui apatenimakanuat auassat, tshetshi eka mukᵘ mamitunenitahk tshetshi matshi-tutahk.

Tipatshimeu, utshimashkueu Munik, ushima Robert ka akushiniti, nanitam tshipukatshenishapani. Peikuau ma etaht nutshimit, ekue unipanikueni utatshishia ne auass. Utauia nenu natukuienishapani ushima.

Uauineu etashiniti utauassima mak tshekuannu etutaminiti.

Shikuanitakanipan mani ueshkat. Amishkᵘ ashtuakanu. Miam shiship-pishimua tshe nashipepitshinanut. Peikuau itatshimu Enen, nimushekuamunan nete pessish Nashkuaikanit. Tshipa minuatamuat nenu auassat kie uinuau shikuanitaht.

Atanutshenanu, tipatshimakanu ka inniut Tshakapesh, tanite uetshipanit. Katshituashkua (Matshi-katshitushkuan) nipaienishapani nenua utauia kie ukauia. Katshi naipamat ukauinua kie utauinua, ekue uepimitak nete upime ushpaiua. Ekute anite pietakushit Tshakapesh, ka mataka. Umisha kanuenimiku mak mishta-tshinipinitautshu. Mishta-minuatamᵘ e metuet ashit atshapia kie akashkua, ui natshi-niapaieu nenua ka nipakaniti uikanisha. Katshi katshitinat ekue nutenat, ekute anite meshkamuat upishkueunua ukauia. Aishkat ekue uapatak meshkananu, pishimua umeshkanaminu. Eukuannua nenua tshe ui katshitinat tipishkau-pishimua. Katshi katshitinat, ekute enukushit pishimut, umisha ashit uitapamiku.

Kassinu tshekuan nakatuapatakanipan, manapashtakanipan kie apatannipan. Miam ne ushkatsheush, piminu anite tatamupan ne nukum tshe nakatak, tshek ma auen shiueniti. Uipat kie anitshenat ishkuessat kie napessat pikutapanat tshe aitutuaht aueshisha. Uitamuakanipanat uipat tshetshi nakatuapatahk aitatussetaui, tshetshi eka ishkuashuht. Tshipa tshi ishi-tshishkutamuakanuat kie tshipa ui ishi-uapatiniakanipanat mitshet kutakanu tshekuannu miam auen eka menuinniuiti kie enushaniaushuti. Auassat tshipa ui uapatiniakanuat tshekuannu tshe nakatuapatahk nete aitutetau nutshimit. Shash a ne tshimueshtinenan neme ka ishinniunuanut? Nimitaten nene ka ishinakuak.

Mitshet tshekuannu tshipa tshi tshishkutamuakanuat anutshish auassat, eukuan tutakanipan ueshkat, tshe aitatussenanut nete nutshimit, mitshuapit, tshe itapashtat tshekuana miam ush e pushinanuti, eshi-tshishikat. Nanitam tshetshi apashtaht aiamieunnu. Napessat tshetshi tshishkutamuakaniht tshetshi tutuaht ashama, tshetshi tutahk utinu, apuia, utapanashkua. Ekᵘ ishkuessat tshipa ui tshishkutamuakanuat, tshetshi assimeht, tshe piminueht, tshetshi atanasseht. Shashish, kassinu tshekuannu uitamuakanipan, tshe aitatussenanunit. Ne meshta-ishpitenitakushit atikᵘ e aitutuakanit : mishtikuai, umanishish. Kassinu tshekuan ishpitenitakanipan.

Tshipa tshishkutamuakanuat auassat innu-aimunnu mak innu-aitunnu tshetshi itatusseht. Miam ne peikᵘ ussinitshishu ka uitshi-atussemeua nenua tshishennua, ka mishta-pikutaua e aitatusset. Tshipa tshishkutamuakanuat tshetshi naikuaht atikua, mishtikuaia. Tshipa tshi tutamuat pishakanessina : atikuiana kie ma atshikuiana tshipa apatshieuat.

Ueshkat, Innuat mishta-tshisheuatishipanat. Kassinu auassa uauitshiepanat ianimuniti at shukᵘ eka ka tshinuemaht.

Nimishta-mushtueniten auassat tshetshi uitamuakaniht tshekuannu nete nutshimit, tshe aitatusset. Mate, ueshkat tutakanipani umatshunishimuaua. Kassinu tshekuannu tshetshi uapatiniakaniht : aueshisha tshe aitutuaht. Apu auen tat tshe tshishkutamatshet.

Uauinitishu Ben Mckenzie, uitamᵘ anite ka inniut, tshishikunu ka inniut mak ushtesha ka inniuniti.

Kassinu tshekuan tutakanipan : auass umetuakana anite mishtikut utinakanipani kie apu ut mitshet kanuenitak.