Atanukana mak tipatshimuna

Ueshkat tshishennu an aiamiapan. Uin an uishamakanipan auassa enniunitaui, shutshishtamakanipan auass ekue uinakanit tshe ishinikatakanit Mani kie ma Shushep. Eukuan nanitam aitinanuipan.

Shashish innuat takuannikupan eshi-aimiaht. Atut shukaituakanuat miam anutshish. Ekᵘ ne e uauitakanit kushapatshikan, mishta-shutshishimakanukupan, ua natu-tshissenitakaniti tshekuan itapashtakanipan, tshishennuat nenu mukᵘ apashtapanat.

Mishta-apashtapanat aiamieunnu Innuat kassinu tshekuannu etutakaui. Apu ut nasht apashtaht anite manitushiunnu iu Mitushapeu. Mishta-aiamiapanat kie mishta-apatenitamupanat nenua tshishikua meshta-aiamiananuniti.

Ueshkat innu animiuipan nete nutshimit etati. Apu ishinakuak anutshish, anu uetshiu.

Apu nita auen matenimak nutshimit Eukuan mukᵘ tshiam nipetuati tiepuashit auen, nimushum Mishtikushish eka enniut. Nishunashkuatein, nituteti nishunashkuatei-massina, mishta-minu-tshishikau. Ekue petuk auen tiepuashit : ‘Napaien’, shukᵘ minutakussu. Eukuannu nimushum etshe netuapamit tshatutet. Eshpish mishta-papamuteian nete nutshimit, apu nita tshekuan matenitaman. Anu ute innu-assit nikushtatshiti anite peikuau.

Tipatshimu Mitushapeu ka utatshimikut ukauia eka menuinniunniti. Mishta-ushkuinipani ukauia peikuan kie mishta-atussenipani. Kassinu anitshenat ishkueuat mishta-atussepanat at shukᵘ eka menuinniutaui. Apu ne ishinakuak anutshish iu.

Apu ut ishpaniht tshekuannu innuat. Kassinu eukuan ishinakushinanipan. Mukᵘ ne auen ka nipatatshet minu-mashaimuakupan ataunnisha, nete Nutashkuanit, Ekuanitshit. Nutshimit kie takuanipani atauitshuapa. Innuat tutamupanat ashit umashunishimuau. Uauitshitunanipan. Ne auen eka ka mashinaimuakanit, uitshikupan kutaka innua, mitshiminu, patshuianu tshetshi tutak umashunishima.

Nanitam tshekuan ashamitunanuipan nepatakaniti kie uauitshitunanuipan miam auen iakushiti. Uipat kushpipanat auenitshenat eka tshekuannu matshitaui innu-assit. Auen nepatatsheti, kassinu auennua tepaueu etashiniti. Nutim tshekuan ashamitunanuipan.

Eshkᵘ eka kushpiht ashuapamituat, passitsheuat tshetshi uitahk etaht anite kie ma tshetshi uitahk tekushiniht.

Tapan anite innu kuenenitak atauitshuapissinu nete nutshimit mak tapanat kie kakusseshiht/mishtikushuat kuenenitahk. Apu ut mishta-mishati ne atauitshuapiss kie ne mitshim, utit ut petautakanipan.

Eukuan an atimᵘ tshitshue kueshapatak itakanu, uin an metshitat aueshisha tshetshi nipaiakaniti umushuma. Anite atanukanit nititatshimushtakuti mani nimushum : maikan ka ui atimut. maikan itiku atimua, shiuenini, eukuan an tshe mut tshimushum ekᵘ nin, ekuan tshe nipian anite nipiti.

Takuannu auass tshetshi uitamuakanit tshekuannu anutshish. Ueshkat mishta-katuakanipan e aishpanniti.

Ueshkat, apu ut minakaniht tshetshi taht auassat anite pessish menuinniuti ishkueua nutshimit. Tshitishauakanipanat tshe ishpish minuinniuniti nenua ishkueua. Ben Mckenzie tipatshimu ka tshitishauakaniht peikuau euassiut.

Mishta-shashish, apu ut nipik. Mukᵘ tshiam pipunipan. Auass nakatiku uikanisha anite matukapit, usham utikumu itakanu. Katshi tshituteniti ukauia mak utauia, mishta-mau apu tshimuet. Uapameu pietuteniti Atshena, shetshishu. Mukᵘ ma, nenua umushuma uitshiku, natutikumatiku ekue tshiuetaikut. Tekushiniht nete etaniti uikanisha, apu minuatikut nenua ukaumaua, Atshen ekue tshitutet. Eshkᵘ eka tshitutet, ekue itat “akua ma eka tshi tshimueuiekui mati ne nussim”. Nenu tshipa minuatamᵘ tshi pimutakuatat nipin-pineshisha. Ekue tshitutenanut inanu, natshi-nipinenanu. Ui tutuakanu auass tshetshi tshimuet. Mitshetuat auenitshenat tshatuteht netuapamaht nipina. Meshkuakaniht nipinat, tshika mamishkutshipanu nipin inanu. pipun-pishimuat. Kutuasht-tatupishimua tshika nipin kie kutuasht-tatupishimua tshika pipun. Tapue ma auass ekue pimutakuatat pineshisha. Tshek ma anite apu takushinit auass, natuapamakanu, mukᵘ umatshunishima takuanua. Akushiu anite mishtikut pineshish itakanu. Utinikushapan nana pineshisha, uishaushinua mak miam uetakunishkueunishiti eshinakushiti.

Auass nakatiku utauia kie ukauia usham utikumu. Atshena utitiku, natutikumatiku ekue tshiuetaikut nete etaniti uikanisha. Tekushiniht nete etaniti uikanisha, apu minuenitakannit pieshikut Atshena. Kau ekue tshituteniti. Uitamakuat Atshena tshe ui tshimueuiaht auassa, usham tshika mishta-manua. Tapue ma, mishta-mau auass eka uiapamat umushuma. Kassinu tutuakanu tshetshi tshimuet. Ui pimutakuateu nipin-pineshisha. Ueshkat anite assi muku pipunupan. Natshi-nipinenanu, mitshetuteuat aueshishat. Mitshet tshekuannu natshishkamuat, mitshet auennua tepaueuat. Tshek ma ekue mishkuakaniht nipinat, ekue tshi pimutakuatat auass. Eshpish nenu tutak apu uapamakanit nana, miam pineshish ishinakushu itakanu. Ne eshpanit, eukuan uet tshi tshissenimakaniht tshe itashiht pishimuat, tshe pipuk kie tshe nipik.

Ueshkat uipat auassat ishi-ashamakanipanat nutshimiu-mitshiminu.  Anutshish nasht apu mitshiht nenu auassat, matshimatamuat.

Uauineu aueshisha ka taniti kie ka itashiniti ueshkat mak ka ishi-uapamat anite pessish uinipekut kie nete nutshimit : mashkua, atikua kie ashit musha. Anitshenat atikuat tapanat anite pessish ekᵘ anutshish apu taht, minashkuau-atikuat mishta-uitshitipanat kie uinnupanat. Uauineu etenitakushiniti atikua kie musha, tan e aitiniti miam uashakuniti. Mishta-tshikamakushu an iteu, uashakuti. Apu animatshenitakushit atikᵘ e tshitutakanit : peshuetamᵘ, kuishkᵘ nateu auennua. Etataui anite napetikᵘ kie ishkuetikuat nasht apu kushtatshit napetikᵘ kie ne iapit nepakaniti ishkuemush apu tshitishimut ne napemush. Mush ashit apu kushtatshit ekuan ekue natat auennua. Masten, ekue tipatshimut ka natauht, musha ka uapamaht kie ka nipaiaht.

Mitushapeu tipatshimeu aueshisha: Kassinu aueshish tshi natukuitishu itakanu miam ne kukamess. Apu nita tshika ut mishkuakanit aueshish e nipit, usham takuannu anite etutet ua natshi-nipiti ipanat tshishennuat. Tau ashit itakanu namesh meshta-mishishtit.

Uauitakanu tan eshi-naushunakanit ne auen tshe kapitenut mak tshekuannu tshe tutak nemenu kushpinanuniti.

Kueshpinanuti, utinakanu peikᵘ innu tshetshi kapitenut. Uin nenu tshika uitamᵘ tan tshe aitinanunit. Utiniku innua usham shutshenimiku kie kassinu natutuakanu.

Nutshimit etananuti, minu-uitamuakanipan tshekuannu ueshkat ishkueu, mishta-apatishu etati. Kassinu aitatussenanuipan nete nutshimit : e kussikuashunanut, e maushunanut, e massinitshenanut. Kassinu tshekuan apatanipan, mate massinitshenanipan kie ne apatanipan utashtishimeukᵘ, pashakanipan, eukuan an usheshtakuiapimikashunanipan.

Ka ishinakuannit utinniun mak utatusseun ishkueu nutshimit e ashuapamaushuti. Menuinniuti tepishkanit, shaputue ekue unit uiapannit ekue pimutet kie uin. Apu ut minekash nakauikanut ishkueu menuinniuti.

Nete itetshe Unaman-shipit menu-tshissenitaman iu : pakatakana, shipua kie nipia. Uauitamᵘ eishinikatakannit tanite ka aitutet ueshkat. Mitshet aishinikatakanua neni nipia, shipua kie pakatakana. Nete itetshe etutakaniti anutshish ushkutima, takuan anite nikuashkan, kukuminash an itakanu. Natuenitamupan tshetshi aimituakanit auen kueshpiti. Anutshish tutakanua anite ushkutima. Nishatshuapatenan ne ashit kauashtenimanitshesht. Ekue itak : « Apu ut natuenitak nenu tshetshi nissipanakanit ne kukuminash ». Tshika nashipeshtakanua ushkana nitikᵘ, nuitamuau etenimak, iteu. Ne mashten tshe takuak ushkutim iu, tan nipa tshi nita iteniten tshetshi takuak anite ushkutim, ekute anite nipapimutetan, iu.

Ueshkat, innu mishta-shatshikupan unataun, mukᵘ eshinakuannit tshekuannu iapashtati e nataut tshi nipatatshepan. Mak ashit, innuat nipaiepanat atikua mukᵘ tshe ishpish ishpaniht tshetshi mitshishuht. Minuenitamupanat nepaiataui peikᵘ kie ma nishᵘ atikua, apu anu ut nipaiaht. Anutshish, mishta-nipaiakanu atikᵘ. Apu ishinniunanut miam ueshkat.

Eshpish nanitam uiushit innu utush kueshpiti, ekue nitautshinnit anite tshekuannu utat ukueiat. Upakatakan nenu itakanu. Mishta-kushkushikuat anitshenat natukunishat uiatamuakaniht nenu.