Atanukana mak tipatshimuna

Nishtᵘ etashtet : Aiashess nutim tshi shaputueshkamᵘ nenu ka nakashkakut ekue tshi utitat ukauia mak utauia. Eshpish aikamikut utauia, ekue utamuat uteueikana, ekue pashtenit assinu, ishkuatenu. Aiasheu upimim apatenu ekue shakaikanipeianit. Uauitakannu tshekuannu mak aueshishat uinnuht anite uiauat.

Nishᵘ etashtet : Aiashess natuapameu kukuminasha ekue uitamakut tan tshe aitit tshetshi natat uikanisha. Mitshet tshekuannu tshika ui shaputueshkamᵘ eshkᵘ eka utitat uikanisha.

Kassinu nishtuapatamᵘ utshimashkueu André eshinikateniti anite eshinakushit ne atikᵘ anite atamit. Kassinu tshekuan apashtakanipan iu, apu tshekuan uepinakanit. Auat ne umetshi mitshininanipan.

Eukuan an atimᵘ tshitshue kueshapatak itakanu, uin an metshitat aueshisha tshetshi nipaiakaniti umushuma. Anite atanukanit nititatshimushtakuti mani nimushum : maikan ka ui atimut. maikan itiku atimua, shiuenini, eukuan an tshe mut tshimushum ekᵘ nin, ekuan tshe nipian anite nipiti.

Auass nakatiku utauia kie ukauia usham utikumu. Atshena utitiku, natutikumatiku ekue tshiuetaikut nete etaniti uikanisha. Tekushiniht nete etaniti uikanisha, apu minuenitakannit pieshikut Atshena. Kau ekue tshituteniti. Uitamakuat Atshena tshe ui tshimueuiaht auassa, usham tshika mishta-manua. Tapue ma, mishta-mau auass eka uiapamat umushuma. Kassinu tutuakanu tshetshi tshimuet. Ui pimutakuateu nipin-pineshisha. Ueshkat anite assi muku pipunupan. Natshi-nipinenanu, mitshetuteuat aueshishat. Mitshet tshekuannu natshishkamuat, mitshet auennua tepaueuat. Tshek ma ekue mishkuakaniht nipinat, ekue tshi pimutakuatat auass. Eshpish nenu tutak apu uapamakanit nana, miam pineshish ishinakushu itakanu. Ne eshpanit, eukuan uet tshi tshissenimakaniht tshe itashiht pishimuat, tshe pipuk kie tshe nipik.

Ben Mckenzie uitamᵘ auen ne Kuekuatsheu mak tshekuannu uet eka tat anutshish.

Uauineu aueshisha ka taniti kie ka itashiniti ueshkat mak ka ishi-uapamat anite pessish uinipekut kie nete nutshimit : mashkua, atikua kie ashit musha. Anitshenat atikuat tapanat anite pessish ekᵘ anutshish apu taht, minashkuau-atikuat mishta-uitshitipanat kie uinnupanat. Uauineu etenitakushiniti atikua kie musha, tan e aitiniti miam uashakuniti. Mishta-tshikamakushu an iteu, uashakuti. Apu animatshenitakushit atikᵘ e tshitutakanit : peshuetamᵘ, kuishkᵘ nateu auennua. Etataui anite napetikᵘ kie ishkuetikuat nasht apu kushtatshit napetikᵘ kie ne iapit nepakaniti ishkuemush apu tshitishimut ne napemush. Mush ashit apu kushtatshit ekuan ekue natat auennua. Masten, ekue tipatshimut ka natauht, musha ka uapamaht kie ka nipaiaht.

Mitushapeu tipatshimeu aueshisha: Kassinu aueshish tshi natukuitishu itakanu miam ne kukamess. Apu nita tshika ut mishkuakanit aueshish e nipit, usham takuannu anite etutet ua natshi-nipiti ipanat tshishennuat. Tau ashit itakanu namesh meshta-mishishtit.

Utshimashkueu André uauitamᵘ tan eshi-tshishinakanit atikuian. Utip nenu apastakannu, ekute ekutshimakanit. Nutim nenu uauitamᵘ e aitinanunit. Tshashiakanit, mishta-nussishu ne atikuian. 

Ben Mckenzie uauitamᵘ eshinikateniti pakatakana tekuanniti Mishta-shipit, nete itetshe Labrador City. Uineu ashit eshi-taniti namesha nete shipia mak shakaikana.

Ueshkat, innu mishta-shatshikupan unataun, mukᵘ eshinakuannit tshekuannu iapashtati e nataut tshi nipatatshepan. Mak ashit, innuat nipaiepanat atikua mukᵘ tshe ishpish ishpaniht tshetshi mitshishuht. Minuenitamupanat nepaiataui peikᵘ kie ma nishᵘ atikua, apu anu ut nipaiaht. Anutshish, mishta-nipaiakanu atikᵘ. Apu ishinniunanut miam ueshkat.

Mishta-kashekauat kueshpitakanitaui anitshenat auassat tsheshkutamuakanitaui innu-aitunnu. Mishta-natutamuat uatamuakanitaui tshe aitutuaht aueshisha. Tan tshe aitiht natautaui, mishta-akua tshika ui tutakanu. Mishta-akua tutuakanu napeu netauti, umatshunishima tshe ishinakuaniti. Mishta-ait itenitakuan anutshish.

Akua tutuakanipan aueshish katshi nipaiakanit. Mishta-ishpitenimakanipan.

Ka inniut nete nutshimit Utauia nenua tshishkutamakushapan tshetshi nataut miam nenua amishkua kie ma kutaka aueshisha. Mitshet aueshisha natauipan, niaiepan mashkua nanikutini ekue tutuat mashku-pimia. Kassinu anite aitutepan kassinu papamutepan. Kie mitshet innuat uapamakanipanat innuat nutshimit, uashaunnuat, tshishe-shatshiunnuat kie Utshimassit innuat. Ueshkat mishta-mitshetipanat atikuat apu taht anutshish. Mishta-natauipan ueshkat, apu tshi nataut usham shash tshishenniu. Tanite apatshiakanu nishkitu tshetshi kushpinanut kie nataunanut. Utauia nete tanishapani e mushuanit assinu ekue kasseueniti nete Tshishe-shatshit eku uin nete inniuishapan Pakut-shipit. Kassinu unatau-assinit utauaia aituteshapan, nuash nete kaiassimeua etaniti. Nenu ashit ka aitatusset, uashuapan kie mishta-nipaieshapan utshashumekua. Eukuannu nenu iashu-patshitinak utshissenitamun, tshetshi tshissenitaminiti auassa. Eukuan ishinniuipanat ueshkat.

Mishta-auassiuishapan ka tshishkutamuakanit kassinu nutshimiu-atusseunnu. Tan tshe aitutuat aueshisha, tshe ishi-assimet mak tshe itenuet nutshimiu-mitshiminu. Mishta-mashkuanipan atusseunnu, mishanipan eshpish animannit mukᵘ anutshish, tshissenitamu eshpish mishta-minu-minikut ukauia. Mishta-minu-apashtau anutshish.

Mishta-auassiuishapan ka tshishkutamuakanit kassinu nutshimiu-atusseunnu. Tan tshe aitutuat aueshisha, tshe ishi-assimet mak tshe itenuet nutshimiu-mitshiminu. Mishta-mashkuanipan atusseunnu, mishanipan eshpish animannit mukᵘ anutshish, tshissenitamu eshpish mishta-minu-minikut ukauia. Mishta-minu-apashtau anutshish.

Mitshetuait aitapatshiakanu atikuian : matshunisha tutakanua, teueikan mak pishakanessina. Mukᵘ aiat apu atusseshtakaniti neni eshkana kie ne atikᵘ. Mishta-anema tshekuannu atinamuat innuat, e aitinanunit mak aitutuakanit ne atikua.

Katshi nipauht ekue kushpiht, katshi nipaianiti atikua unapema napinnit ekue nashipeht. Kau ekue kushpiht tekuatshinnit.

Umisha Nishapet tipatshimushtakupan Mani, uapataminishapani ka mishta-shiuennanunit shashish mukᵘ uin e tshissitutak, shash apu ut mishta-shiuennanunit. Peikuau e nutepaniht mitshiminu, mueshapanat namesha ka pashuniti Nipaiamianannu, nasht apu uitshipuakue uin Mani.

Peikᵘ innu ishinikatakanipan Kaianuet, natuapameu nenua ka matshi-tutuakaniti innua.  Memintaieu nanitam, itakanu, nipaiepan auennua. Eukuannua nenua Kaianuet netuapamat. Mitshet tshekuannu tutamᵘ tshetshi katshitinat, tshetshi tshishkueiat.  Papeikᵘ tshi tutueu, kassinu nenua ka matshikaushiniti tshi nipaieu.

Anite atanukanit uauinakanu Kuekuatsheu ka aitit ueshkat nutshimit. Ishpanipan ume anitshenat ishkueua ka peikussiht, tipan ka taht nutshimit. Ishkueuat natauishapanat kie uinuau, umenu tepatshimakanit ne Kuekuatsheu. Ishkueua piminuenua, atikua ui ashamakanu mukᵘ apu minuatak nenu tshekuannu ua ashamakanit, nenu ushtikuannu, eukuannu ua mitshit. Kuekuatsheu mishkueu ishkueua tshe uitshimat kie kutaka ishkueua tshe uitshimakaniti ushtesha kie ushima. Uauitakanu anite shashish ka ishinniunanut. Tan ka aitutuakanit kuekuatsheu.

   Mamauatshieshu ushimisha itakanu Kuekuatsheu, kassinu nenua aueshisha. Tshissenimeu tshe pimuteniti Uananuieua eshpish nipinnit. Eshpish apitashkuannit pishimussa, tshissenimeu tshe pimuteniti Uananuieua. Matshikakuannu uitui, itakanu. Shikush shakatshueuepatashu itakanu, uapateu, ueshama kashkueua itenimeu, pemutenikueni. Pakaieu utamishkuma itakanu ne shikush, tshika ui tshitamueuat nenua amishkua eshkᵘ eka apita-tipishkanit. Kushapatamᵘ itakanu, pitakaieu anite Uananuieu, shipateu nenua. Tepishkat tshitshipitinanu, tshishikashteu miam kashikati eshinakuak. Uananuieu tekushinit, mukᵘ matakapa, mueshkatsheu.

   Natuapameu nenua ka tshitishimikut. Kuekuatsheu tshiputuiemeu nenua, uituinu nenu tshimushu. Ushimisha nenua natuenitamueu tshetshi nanim ituteniti tshetshi aishkat umitshiminiti aishinnua, apu tshika ut punashkamakat assi.

   Tshika ui tshishtaputshikuneueu, tshika nashipeu nete uinipekut tshetshi eka nanautat nipia, tshek ma aishinnuat ui miniti nenu nipinu iu. Katshi tshishtaputshikuneuet, ekue natakashit ekue nipat eshpish nipinnit, ekue apita-nipinnit. Kuessimu,minuat kueshkupanit, shash apitashkuannishapan itakanu ekue unit. Shekashkuaimᵘ ekue naimaniteueu. Uitshinanishapan anite takuakut, Atshena nenua epiniti. Shiuennanu mukᵘ mishanu mitshiminu nete etaniti Atshena, apu ui patshitinak nenu. Nimaniteu au iteu kuekuatsheu nenua Atshenissa. Utinamashu mitshiminu. Atshen tekushinit uitamuakanu katshi utinakannit umitshim, nika nipaiau iu ne Atshen. Kassinu tshekuannu tutamᵘ tshetshi nipaiat nenua ka utinaminiti umitshim. Mashten, Kuekuatsheu niapaieu nenua Atshena.

Kuekuatsheu uieshimeu shishipa, natuenitamueu tshetshi niminiti e pashikuapiniti. Aiashkau nipaieu eshpish niminiti.

Shiuenu Kuekuatsheu. Nanatuapatamᵘ tan tshe ishi-uieshimat aueshisha tshetshi mitshishut. «Nipetan nipin» iteu aueshisha tanite ueshkat inanu, nanitam pipunishapan.

Kuekuatsheu natshi-maniteu anite etaniti maikana. Uishamiku tshetshi mupimet mukᵘ itakanu tshetshi akunakuneuiti eshpish tshishauenanunit. Apu natutak etakanit.